अब देउवा निष्क्रिय, गगन–पूर्णबहादुरलाई पार्टीको जिम्मा, संसद ब्युँतिए प्रधानमन्त्री, जलेको पैसा फेक (भिडियोसहित)

काठमाडौं— नेपाली कांग्रेसका सभापति शेरबहादुर देउवा र देउवापत्नी आरजु राणा देउवा ३४ दिनपछि सार्वजनिक भएका छन् । भदौ २४ गते बर्बर आक्रमण हुँदा समेत कार्यकर्ताको साथ नपाएका उनीहरु कार्यकर्ताको भीड छिचोल्दै सानेपास्थित पार्टी कार्यालय पुगे । सायद पार्टी कार्यालय आउँदा जत्तिकैको सुरक्षा २४ गते पाएको भए सार्वजनिक भइरहन नपर्ने पनि थियो । आरजुको अनुहारमा पुरानै चमक देखिन्थ्यो भने देउवामा पनि उत्साह मरेको थिएन । सकारात्मक पक्ष चाहिँ के भने तत्कालीन प्रधानमन्त्री केपी शर्मा ओलीको जस्तो अहंकार उनमा थिएन । सबै मृतकप्रति श्रद्धाञ्जलि र परिवारलाई समवेदना दिए । अराजक गतिविधिको विरोध गरे । यो घटनालाई उनले इतिहासकै एक डर लाग्दो दिनको रुपमा स्मरण गरेका छन् ।