चीनमा च्यापिए ओली, मोदी र सीकै इग्नोर, लिपुलेकको एजेन्डा फेल, एकपछि अर्को विवादमा तानिए (भिडियोसहित)

काठमाडौं— सोभियत सङ्घको पतनपछि अघोषित तर सैन्य गठबन्धनसरह स्थापित शाङ्घाई सहयोग सङ्गठन (एससीओ) को २५औँ शिखर सम्मेलन चीनको तियानजिन सहरमा सकिएको छ । नेपालका दुई छिमेकी मुलुक भारत र चीनसहित रुस, इरान, पाकिस्तान, काजाकिस्तान, किर्गिस्तान, ताजिकिस्तान, उज्बेकिस्तान, बेलारुस गरी १० सदस्य राष्ट्र र १६ संवाद साझेदार मुलुक गरी २६ देशका राष्ट्रप्रमुखहरूको तियानजिन भेलाले विश्व राजनीतिमा भू–राजनीतिक तरङ्ग पैदा गरेको छ । एससीओको एजेन्डाभन्दा चीनका राष्ट्रपति सी चिनफिङ, रुसी राष्ट्रपति भ्लादिमिर पुटिन र भारतीय प्रधानमन्त्री नरेन्द्र मोदीजस्ता शीर्ष नेताहरूको भेट सर्वाधिक चर्चामा छ । बदलिँदो र ध्रुवीकृत उन्मुख भू–राजनीतिमा भीभीआईपी नेताहरूको भेटले विश्व राजनीतिमा खैलाबैला मच्चाउँदा संवाद साझेदार मुलुकहरूको उपस्थितिको लेखाजोखा हुन थालेको छ । एससीओमा संवाद साझेदारको रूपमा रहेको नेपाल र प्रधानमन्त्री केपी शर्मा ओलीको सम्मेलनमा कन्तबिजोग देखिएन, यतिबेला यो विषय चर्चामा छ । विश्व राजनीतिका हस्तीहरूमाझ प्रधानमन्त्री ओलीको उपस्थिति छायामा प¥यो । फलतः अहिले स्वदेश नफर्किंदै प्रधानमन्त्री ओलीको चीन भ्रमण र कूटनीतिक भेटघाट आलोचनाको केन्द्रमा छ ।