ताइवानमाथि आक्रमण गर्ने चीनको तयारी, चौतर्फी सैन्य घेरा हालियो

चीनले ताइवानमाथि शक्तिशाली आक्रमणको तयारी स्वरुप रणनीतिक दबाब सुरु गरेको छ । चीनले आफ्नो स्थल सेना, जल सेना, वायु सेना तथा रकेट बल सहभागी गराएर कैयौं दिशाबाट ताइवानमाथि आक्रमण गर्ने गरी संयुक्त अभ्यास शुरू गरिसकेको छ ।

ताइवान चीनको दक्षिणपूर्वी तटबाट करिब १०० माइल टाढा रहेको एउटा टापु हो । चीनले ताइवानलाईण् आफ्नो प्रान्तमध्ये एक मान्दै आएको छ । र, अन्ततः एक दिन फेरि चीनको हिस्सा बन्ने कुरामा विश्वास राख्छ । चिनिया राष्ट्रपति सी जिनपिङले ताइवानको ‘एकीकरण’ पूरा हुने बताइसकेका छन् । उनले यसलाई हासिल गर्न बल प्रयोग गरेर भए पनि चीनमा गाभ्ने योजना रहेको यसअघि नै उद्घोष गरिसकेका छन् । कुनै पनि हालतमा ताइवानलाई आफ्नो देशमा गाभ्ने तवरले लागी परेको चीनले अहिले भने शक्तिशाली आक्रमणको तयारी गरिरहेको छ ।

यसका लागि अहिलेसम्मकै ठूलो र सशक्त सैन्य अभ्यास शुरु गरिएको चिनिया सुरक्षा अधिकारीले बताएका छन् । पूर्वी थिएटर कमाण्डले आफ्नो सामाजिक सञ्जालमार्फत् यस्तो जानकारी दिएका हुन् । जसअनुसार चीनले आफ्नो स्थल सेना, जलसेना, वायु सेना तथा रकेट बल सहभागी गराएर कैयौँ दिशाबाट ताइवानमाथि आक्रमण गर्ने गरी संयुक्त अभ्यास शुरु गरेको छ ।

यो मुख्यरुपमा एकै साथ, जल, जमिन र आकाशबाट ताइवानमाथि आक्रमण गर्ने र आफ्नो क्षमता परीक्षण गर्ने चीनको अभ्यास हो । चिनिया पिपुल्स लिबरेशन आर्मीले आफ्नो एक वक्तव्यमा यो अभ्यास स्वतन्त्र ताइवानको पृथकतावादी शक्तिविरुद्ध एक कडा चेतावनी र सशक्त प्रतिकार भएको बताएको छ । साथै आफ्नो सैन्य अभ्यासलाई चीनको सम्प्रभुता र राष्ट्रिय एकताको रक्षाका लागि वैधानिक कारबाहीको संज्ञा दिएको छ । चीनले ताइवानलाई आफ्नो अंग मान्ने गरे पनि ताइवानले भने आफू स्वतन्त्र देश भएको दाबी गर्दै आएको छ ।

यसका कारण चीनले केही वर्षयता ताइवानमाथि दबाब बढाउन समुद्र क्षेत्रमा सशक्त सैन्य अभ्यास गर्ने गरेको छ । ताइवान र चीनबीच ७१ वर्षयता तनाव जारी रहँदै आएको छ । सन् १९४५ देखि १९४९ को चिनिया गृहयुद्धपछि ताइवान चीनबाट अलग भएको थियो । त्यसबेला माओत्से तुङको अगुवाइमा कम्युनिस्टहरू एकातर्फ लडिरहेका थिए भने दोस्रोतर्फ चिनिया पूर्वराष्ट्रपति च्याङ काई सेकको नेतृत्वमा राष्ट्रवादी शक्ति थियो । च्याङ काई सेक पक्ष युद्ध हार्न थालेपछि उनीहरू यस्तो ठाउँ जान चाहन्थे जहाँ उनीहरूको शक्ति पुनः बढोस् । उनीहरू त्यसपछि ताइवान गए र त्यहाँ निर्वासनमै रहेर सरकार गठन गरे । त्यसयता चीनले ताइवानलाई आफ्नो अधिनमा ल्याउन सकेको छैन ।

चीनले ताइवानलाई आफूबाट अलग भएको टापु ठान्छ । यद्यपि, ताइवानले आफू एक सार्वभौम राष्ट्र भएको बताउँछ । ताइवानसँग व्यापारिकसँगै राजनीतिक सम्बन्ध राख्दा तेस्रो राष्ट्रले आफूसँग अनुमति लिनुपर्ने चीनको भनाइ छ । विश्वमा एक चीन नीति मान्ने राष्ट्रले ताइवानलाई चाइनिज ताइपेइ भनेर चिन्छन् । ताइवानसँग कूटनीतिक सम्बन्ध भएका राष्ट्र विश्वमा १३ वटा मात्र छन् । अर्थात् विश्वमा मात्र १३ राष्ट्रले ताइवानलाई सार्वभौम राष्ट्र मान्छन् । संयुक्त राज्य अमेरिका र ताइवानबीच पनि कूटनीतिक सम्बन्ध छैन ।

तर उसले चीनले प्रान्त मान्ने ताइवानलाई हतियार बेचिरहेको छ । उता अमेरिकी हतियार पाएको ताइवानले चीनको ‘एक देश दुई प्रणाली’ आफ्नो देशमा लागू नहुने निरन्तर रूपमा बताइरहेको छ । केही वर्षयता ताइवान र चीनबीच युद्धको अवस्था नै निम्तिदै आएको छ । खासगरी अमेरिकाले ताइवानलाई शक्तिशाली हतियारहरू बेचिरहँदा चीन ताइवानप्रति झनै रुष्ट बन्दै गइरहेको छ । चीनले ताइवानमा कुनै पनि बेला आक्रमण गर्न सक्ने अनुमान गरिएको छ ।

किनभने चिनिया राष्ट्रपति सीले ताइवानलाई आक्रमण गरेर कब्जा गर्ने बताउँदै आएका छन् । यसलाई पनि थप बल पुगेको छ । चीनले ताइवानलाई आफ्नो भूमिमा विलय गराउन आक्रमण गरेको अवस्थामा त्यसको प्रभाव क्षेत्रीय देशका साथै विश्वमै पर्ने देखिन्छ । फलतः अहिले रुस युक्रेन र इजरायल हमासबीच चर्किएको युद्धका बीच ताइवान र चीनको संघर्षले विश्वलाई थप अशान्ति तर्फ धकेल्ने र विश्व शक्ति राष्ट्रहरुबीच टकराव बढ्ने प्रबल सम्भावना छ ।