फेरि ग्राउन्डमा रवि : घण्टीघरमा क्रेज, नेतालाई थ्रेट

राष्ट्रिय स्वतन्त्र पार्टी (रास्वपा) का सभापति रवि लामिछाने आजदेखि पार्टीको जिम्मेवारीमा फर्किएका छन् । सोमबार दिउँसो केन्द्रीय समितिको विशेष बैठकबाट रास्वपाले रविलाई पार्टीमा कमब्याक गराएको हो । उनको स्वागतका लागि पार्टी कार्यालयमा ठूलो संख्यामा नेता तथा कार्यकर्ताको उपस्थिति थियो ।

सहकारी प्रकरणमा पाँच जिल्लाको हिरासत बसाइँ, चार जिल्लामा मुद्दाको तारेख धाएका राष्ट्रिय स्वतन्त्र पार्टी (रास्वपा)का सभापति रवि लामिछाने पाँच महिनापछि सक्रिय पार्टी राजनीतिमा फर्किएका छन् ।
गत कात्तिक दुई गते पार्टी कार्यालय वनस्थलीबाट पक्राउ परेका लामिछाने त्यसयता राजनीतिमा प्रत्यक्ष रुपमा सरिक हुन पाएका थिएनन् । विभिन्न पाँच सहकारीको रकम हिनामिना गरेको आरोपमा पक्राउ परेको उनीमाथि सहकारीका साथै संगठित अपराध र सम्पत्ति शुद्धीकरणसमेत मुद्दा चलाइएको थियो ।

योसंगै उनको सांसद पद निलम्बनमा परेपछि उनले आफ्ना सबै पदहरु गुमाउनु प¥यो । तर धमाधम चार जिल्लाबाट धरौटीमा रिहा भएसँगै उनलाई पार्टी राजनीतिमा फकिर्ने बाटो खुलेको हो । चार जिल्ला अदालतमा तारेख धाउँदै आएका उनी केही समय निष्क्रिय देखिए पनि सोमबारदेखि भने पार्टी राजनीतिमा फर्किएका हुन् । सोमवार बसेको रास्वपा केन्द्रीय समितिको विशेष बैठकले रविलाई पार्टीमा पुनः फर्काउने सर्वसम्वत निर्णय ग¥यो ।

लामिछानेको सभापति पद निलम्बनमा परेपछि गत पुस ८ गतेको सचिवालय बैठकले उपसभापति डोलप्रसाद अर्याललाई कार्यवाहक सभापतिको जिम्मेवारी दिएको थियो । सोमबारको केन्द्रीय समितिको बैठकले अर्याललाई उनको पुरानै पदमा फिर्ता पठाएको छ । पार्टी कार्यालय वनस्थलीमा पाँच महिना पछि फर्किएका लामिछानेलाई रास्वपाका नेता तथा कार्यकर्ताहरुले भव्य रुपमा स्वागत गरे। लामिछाने कार्यालय पुग्दा पार्टीपंक्ति तथा सञ्चारकर्मीको बाक्लो उपस्थिति थियो ।

पछिल्लो समय देशमाराजनीतिक सरगर्मी बढेका बेलालामिछानेको पुनरागमनले सबैको ध्यान तानेको छ । देशको चौथो ठूलो दल रास्वपाले आफूलाई कुन कित्तामा लैजान्छ वा कसलाई समर्थन गर्छ भन्ने विषयले तरंगितनेपाली राजनीतिमा उनको पुनरागमनले ठूलो अर्थ राख्ने देखिन्छ ।सरकारमाथि चौतर्फी दबाब र घेराबन्दी भइरहेका बेला रवि र रास्वपाले चाल्ने हरेक कदमले देशको राजनीतिमा प्रत्यक्ष प्रभाव पार्ने छ ।सोमबार पार्टी कार्यायलमा सभापतिमा पुनर्बहाली हुनु पूर्व लामिछानेले आफूलाई दुई तिहाइको सरकारले सिध्याउन हदैसम्मको प्रयास गरेको र आफू यो दुई तिहाइको सरकारबाट जिउदो हुनु नै आफ्नो जित भएको टिप्पणी गरे । साथै उनले अहिले गणतन्त्रवादी भनेर गणतन्त्रको खोल ओडेकाहरुको लाइनमा आफू उभिन नसक्ने भन्दै वर्तमान सरकारमाथि तीर चलाएका छन् ।

आक्रामक रुपमा प्रस्तुत भएका लामिछानेले सरकारको पछिल्लो गतिविधिमाथि धावा बोल्न भ्याए । उनले वर्तमान सरकार जनताको पक्षमाभन्दा पनि व्यापारी र विचौलियाको पक्षमा रहेको आरोप लगाए । गृहमन्त्री रमेश लेखकले राम्रोसंग मन्त्रालय चलाउन नसकेको भन्दै लामिछानेले उनको राजीनामासमेत मागेका छन् ।

सोमबारै बसेको प्रतिनिधिसभाको बैठकमा प्रतिपक्षमा रहेको रास्वपाले वर्तमान सरकारको काम गराइ र रवैया नागरिकप्रति लोयल नभइ मन्त्री र प्रधानमन्त्रीतर्फ लोयल हुन कर्मचारीलाई दवाव दिएको भन्दै आक्रोश पोखेको छ । विशेष समयमा बोल्दै रास्वपाका सांसद मनिष झाले प्रधानमन्त्री जस्तो गरिमामय पदमा बसेका व्यक्तिले कर्मचारीलाई मन्त्रीप्रति लोयल हुनु भन्नु दुर्भाग्य भएको जिकिर गरे । उनले प्रधानमन्त्रीले नियत खराब भएर बालेको हो वा संस्कार नै यस्तो हो भन्दै प्रश्न गरे ।

लामिछानेले आफूमाथि लागेका सबै आरोपहरु पखालेर सक्रिय राजनीतिमा फर्किने रणनीति बनाए पनि पार्टी सञ्चालनमा कमजोरी देखिएपछि आफैँ अगाडि बढेको देखिन्छन् । यस्तै मुलुकको पछिल्लो राजनीतिक अवस्था, गणतन्त्रवादी र राजावादीबीचको बढ्दो टसलले निम्त्याएको अस्तव्यस्तताका कारण लामिछानेले आफूलाई सक्रिय राजनीतिमा फर्काउन चाहेको रुपमा हेरिएको छ । चार जिल्लामा मुद्दा दर्ता भएपनि पर्सामा रविविरुद्ध मुद्दा दर्ताको प्रक्रियामा ढिलाइ भइरहेको छ । उनले पर्सामा मुद्दा दर्ताका लागि केही समय पर्खिएपनि मुद्दा दर्ताको प्रक्रियामा सरकारले कुनै सुरसार नगरेपछि अन्ततः उनी पार्टी राजनीतिमा फर्किएका हुन् ।योसंगै लामिछानेको अबको रणनीति आफूमाथि लागेको सबै मुद्दालाई किनारा लगाउनु र पार्टीमा लामो समयदेखिको निष्क्रियतालाई पुनः सक्रिय बनाउनु प्रष्ट हुन्छ । यस्तोमा सहकारी ठगको बिल्ला भिरेर चार जिल्ला काठमाडौं, पोखरा, चितवन र रुपन्देहीमा सहकारीको मुद्दा धाउँदै हिँडेका लामिछानेले आफ्नो जिम्मेवारीलाई कसरी बहन गर्लान् ? त्यो भने आगामी दिनले देखाउने नै छ ।