रविपछि राजावादीको हैरानीमा गृहमन्त्री, राजीनामा माग्ने बढे

सरकारको शक्तिशाली मन्त्रालय गृह सम्हालेका रमेश लेखक इतिहासमा सबैभन्दा कमजोर र निरीह गृहमन्त्री बनेका छन् । बाढीपहिरो विपददेखि सामान्य आमसभालाई समेत व्यवस्थापन र शान्ति सुरक्षा दिन नसकेको भन्दै सरकार र गृहमन्त्रालयको चौतर्फी विरोध भइरहेको छ ।

पहिलो पटक गृहमन्त्री बनेका रमेश लेखक देशमा सुशासन र शान्ति सुरक्षा कायम गर्ने विषयमा चुकेका छन् । विगत ८ महिनादेखि गृहको कमान्ड सम्हालेका लेखकले नागरिकको शान्ति सुरक्षासमेत चुस्त दुरुस्त पार्न नसकेको गुनासो जनमानसमा बढ्दो छ । गृह भनेको नागरिकको शान्ति सुरक्षासंग प्रत्यक्ष सरोकार राख्ने सरकारको जिम्मेवार मन्त्रालय हो । तर लेखकले हाँकेको गृह निरीह मन्त्रालय जस्तो बनेको छ । देश बाढी पहिरो र डुबानको विपदमा पर्दासमेत तत्काल राहत तथा उद्धार कार्यमा चुकेको भन्दै गृहमन्त्रीले आलोचना खेप्नु परेको थियो ।

पछिल्लो समय देशमा राजावादीहरु सल्बलाइरहेको अवस्थामा चैत १५ गते तीनकुनेमा भएको आन्दोलनमा शान्ति सुरक्षा तथा व्यवस्थापनमा गृह प्रशासन चुक्दा मन्त्री लेखकको क्षमतामाथि नै प्रश्न उठेको छ । राजा फर्काउने भन्दै केही हजारको संख्यामा आन्दोलनमा उत्रिएको भिडलाई गृह अन्तर्गतको प्रहरी प्रशासनले आवश्यक शान्ति सुरक्षाको व्यवस्थापन गर्न नसक्दा जनधनको क्षति हुने गरी अप्रिय घटना भएको विश्लेषण भइरहेको छ । बरु प्रहरीको हतियार आन्दोनकारीले खोस्दा प्रहरी संगठनकै रमिता देखियो । तीनकुने घटना नियन्त्रणमा प्रहरी पूर्णरुपमा असक्षम र असफल देखियो । जसका कारण नेपाली सेनालाई सडकमा उतारेर कफ्र्यु जारी गर्नु पर्ने अवस्था आयो । प्रतिपक्षी नेता तथा सांसदहरुले सरकार अभिवावकको भूमिका निर्वाह गर्नुको साटो आफँै उग्र बन्दै गएको आरोप लगाइरहेका छन् । सरकारमा रहेका मन्त्रीहरुदम्ब र अहंकारले भरिँदा सबैलाई रैतीदेख्ने प्रवृत्तिका कारण पनि यो अवस्था आएको भन्दै विपक्षीहरुले आलोचना गरेका छन् ।

सरकार र गृहमन्त्री लेखकको पछिल्लो कामकार्वाहीप्रति सत्तारुढ दलकै नेताहरु पनि सन्तुष्ट छैनन् ।बाढी पहिरोले देशका विभिन्न ठाउँमा मानवीय तथा भौतिक क्षति पुगेको समयमा राज्यले उपस्थिति देखाउन नसकेको आरोप लगाउँदै सत्तारुढ दलकै नेताहरुले चैत १५ गते तीनकुनेमा घटेको घटनामा पनि सरकारी पक्षको लापरबाही भएको टिप्पणी गरेका छन् । सरकारकै कमजोरीका कारण नागरिक र पत्रकारको अनाहकमा ज्यान गएको उनीहरुको तर्क छ ।

राजावादीहरु सक्रिय भएसँगै उनीहरु र विरोधी आवाजलाई दबाउन सरकार जोडतोडले लागिपरेको छ । सरकारको आलोचना गर्नेलाई विभिन्न मुद्दा लगाएर तह लगाउने नीति अवलम्बन गरेको देखिन्छ । तीनकुने घटनाबारे गहिरो अनुसन्धान गरेर सत्य तथ्य बाहिर ल्याउनु पर्नेमा धमाधम राजावादी नेता तथा समर्थकलाई पक्राउ गरी उनीहरुविरुद्ध मुद्दा चलाउन सरकार उद्यत भइरहेको छ । यसले तीनकुने घटनाको मुल विषयलाई विषयान्तर गरेर नागरिकको ध्यानअर्कोतर्फ मोड्न खोजे टिप्पणी पनि भइरहेको छ । साथै तीनकुनेको घटना नियोजित भएको प्रहरीका पूर्वअधिकारीहरुकै आरोप छ । राज्यले सो दिनको आन्दोलनलाई हल्का रुपमा लिँदा अप्रियघटना घटेको भएको उनीहरुको दाबी छ । सम्भावित घटनाबारे पूर्वानुमान गर्न नसक्नु, पूर्व तयारी नहुनुलाई पनि गृह प्रशासनको कमजारीको रुपमा हेरिएको छ । घटना भएपछि भने गृहमन्त्री क्षति भएको स्थलमा पुगेर स्टन्ट गरेको उनीहरुको आरोप छ । घटनाको छानविन र अनुसन्धान गर्ने निकाय प्रहरी हो । गृहमन्त्री जस्तो उच्च पदस्थ व्यक्तिले आदेश दिने हो । तर लेखक सस्तो लोकप्रियता र स्टन्टका लागि घटनास्थलको निरीक्षणमा गएको आरोप छ ।

भाषण गरे जस्तो सजिलो शासन गर्नु हँुदैन भन्ने तथ्यलाईगृहमन्त्री रमेश लेखकको यो ८ महिनाको काम गराईले देखाएको छ । उनी खरो बोल्न र तीखो व्यङ्ग्य गर्न माहिर नेताका रुपमा परिचित थिए । तर जब उनले गृह मन्त्रालय सम्हाले त्यसपछि भने उनको क्षमता छताछुल्ल रुपमा देखिएको छ । जसले उनी भाषण गर्न र बोल्न मात्र माहिर छन् तर काम गर्न र नागरिकमा डेलिभरि दिन सक्षम छैनन् भन्ने तर्कमा बल पुगेको छ ।