केपी ओली कप : मछिन्द्र र त्रिभुवन आर्मी भिड्दै

काठमाडौं—केपी ओली कप फुटबल प्रतियोगिताको तेस्रो संस्करणको उपाधिका लागि मछिन्द्रक्लब र विभागीय टोली त्रिभुवन आर्मी क्लबबिच आज प्रतिस्पर्धा हुँदै छ।

दुवै टोलीका कप्तान र प्रशिक्षकले फाइनलका लागि टिम पूर्ण रूपमा तयार भएको जनाएका छन् । विभागीय आर्मीका प्रशिक्षक मेघराज केसीले दुवै टोली राम्रो भएकाले फाइनलमा पुगेको बताए।यसअघिका कमजोरी सुधार गर्दै फाइनलमा राम्रो खेल्ने उनले बताए। मछिन्द्र क्लबका प्रशिक्षक सन्तोष न्यौपानेले फाइनलका लागि तयार रहेको र साबिक विजेता भएकाले दबाब भएको बताए।

उपाधि विजेताले १५ लाख ११ हजार १ सय ११ रुपियाँ र उपविजेताले पाँच लाख रुपियाँ पाउने आयोजकले जनाएको छ । उत्कृष्ट खेलाडीलाई एक लाख तथा विधागत उत्कृष्टलाई ५० हजार पुरस्कार दिइने छ । यसैबीच, तेस्रो संस्करणको केपी ओली कप फुटबलको फाइनलमा प्रमुख अतिथिका रूपमा विश्वकप विजेता इटालीका पूर्वकप्तान तथा गोलकिपर जियानलुजी बफोनसहभागी हुनेछन् ।