काठमाडौं—अन्तर्राष्ट्रिय महिला च्याम्पियनसिपमा नेपाल उपविजेता बनेको छ । दशरथ रंगशाला भएको अन्तर्राष्ट्रिय महिला च्याम्पियनसिपको उपाधि भिडन्तमा घरेलु टोली नेपालले फिफा वरीयतामा आफूभन्दा ४८ स्थानमाथिको म्यानमारसँग २–० गोलको हार बेहोर्दा अर्को फाइनलमा पनि उपविजेतामा चित्त बुझाउनु परेको हो ।
यससँगै नेपालले औपचारिक र अनौपचारिक प्रतियोगिता गरी १३ वटा फाइनलमा हार बेहोरेको छ । नेपालले सन् २०१० यता ६ वटा महिला साफ च्याम्पियनसिप, तीन वटा साग गेम्स, एक वाफ विमेन्स च्याम्पियनसिप र अन्य तीन वटा अनौपचारिक प्रतियोगिताको फाइनलमा स्थान बनाए पनि उपाधि भने जित्न सकेको छैन ।
यसैबीच, अन्तर्राष्ट्रिय महिला च्याम्पिनसिपमा नेपाली टोलीकी मिडफिल्डर रेनुका नगरकोटे सर्वोत्कृष्ट खेलाडी घोषित भएकी छिन् । घाइते भएर पछिल्लो वर्ष मैदान फर्किएकी रेनुका त्यसअघि कप्तान थिइन् । रेनुका घाइते भएपछि एन्जिला तुम्बापो सुब्बालाई कप्तान बनाइएको थियो । पछिल्लो समय रेनुकाले मिडफिल्डमा उत्कृष्ट खेल्दै आएकी छिन् । महिला च्याम्पिनयसिपमा उत्कृष्ट घोषित भएसँगै उनले ५० हजार रुपैयाँ प्राप्त गरेकी छिन् ।
प्रतिक्रिया