घरेलु मैदानमा जारी चारदेशसम्मिलित अन्तर्राष्ट्रिय महिला च्याम्पियनसिपको फाइनलमा नेपालले म्यानमारसँग बुधबार उपाधिका लागि प्रतिष्पर्धा गर्दै छ ।त्रिपुरेश्वरस्थित दशरथ रंगशालामा हुने प्रतियोगिताको फाइनल खेल साँझ ६ बजेदेखि सुरु हुने तालिका रहँदा नेपाली चेलीको लक्ष्य भने लामो समयदेखिको उपाधि खडरी तोड्ने रहेको छ ।
चार राष्ट्र सम्मिलित अन्तर्राष्ट्रिय महिला च्याम्पियनसिपकोउपाधिका लागि बुधबार नेपाल र म्यानमार भिड्दै छन् । फिफा वरीयताका आधारमा म्यानमार नेपालभन्दा निकै माथि रहे पनि लिग चरणको खेलमा गरेको प्रर्दशनले नेपाली टोलीको मनोबल उच्च देखिन्छ । त्यही उच्च मनोबलका साथ चुनौती दिने मनसायमा रहेकीनेपाली राष्ट्रिय महिला फुटबल टोलीकी कप्तान एन्जिला तुम्बापो सुब्बाले कम गल्ती गर्दै उपाधि उम्कन नदिने बताएकी छन् ।
प्रशिक्षकको योजनाअनुरूप खेल्न सके उपाधि जित्नेमा उनी विश्वस्त छिन् । सधैँ फाइनलमा पुगेर उपविजेतामै नै खुम्चनु परेको नियतीलाई स्मरण गर्दै यो अवसरलाई भने आफ्नो हातबाट उम्कन नदिने उनले बताएकी छन् । साथै,उनले यतिका वर्षसम्म च्याम्पियन हुन नसक्दा आफूसँगै टिमका सदस्यका लागि पनि चुनौती बनेको उल्लेख गरिन् ।टिममा सबै खेलाडी क्षमतावान्र फिट रहेकालेआफूहरू फाइनलमा उत्कृष्ट प्रदर्शन गर्न तयार रहेको कप्तानको भनाइ छ । युरोपमा खेलेकोअनुभव पनि मैदानमा सदुपयोग गर्ने रणनीतिमा कप्तान एन्जिला छिन् ।
चार देश सम्मिलित च्याम्पियनसिपको लिगमा शीर्ष दुई स्थानमा रहेर नेपाल र म्यानमार फाइनल पुगेका हुन् ।दुवै टिम जारीप्रतियोगितामा अपराजित छन् । लिग चरणका खेलमा लेबनान र किर्गिस्तानलाई हराएकादुई टोलीले एकअर्का विरुद्धको खेलमा पनि २–२ गोलको बराबरी खेलेका थिए । नेपालले आफूभन्दा ४८औं स्थान माथि रहेको म्यानमारलाई रोकेको हो । बलियो म्यानमारविरुद्ध दबाब सिर्जना गर्दै खेल्दा सफल भएको नेपाली टोलीका प्रशिक्षक राजेन्द्र तामाङको बुझाइ छ । साथै म्यानमारसँगको खेलमा छुट्टै रणनीति बनाएर खेल्दा सकरात्मक नतिजा प्राप्त भएको र फाइनलमा त्यो प्रयासलाई नै निरन्तरता दिने तयारीमा उनी छन् । प्रेसिङ गेमका लागि युवा खेलाडीको भूमिका महत्वपूर्ण रहेको उनले बताए । नेपालका आठ जना २५ वर्षभन्दा कम उमेरका युवा खेलाडी भएका कारण विपक्षीलाईदबावमा राख्न सहज हुने उनको धारणा छ ।
प्रशिक्षक राजेन्द्रले एकै वर्षमा तीन वटा फाइनल खेल्नु राम्रो पक्ष रहे पनि ट्रफी जित्न नसक्नु कमजोर पक्ष रहेको बताएका छन् । दुई फरवार्ड सावित्रा भण्डारी र रेखा पौडेलबीच तालमेल नमिले पनि अहिले त्यसमा सुधार आएको प्रशिक्षक राजेन्द्रको दाबी छ । प्रशिक्षक तामाङले डिफेन्समा भएको केही गल्ती सुधारका लागि प्रयास भएको जानकारी दिए ।अहिले म्यानमारमा पनि युवा खेलाडी रहेको र त्यहीअनुरूप उनीहरूले पनि रणनीति बुनिरहेका छन् । फाइनल पुगेको यी दुवै राष्ट्रको लक्ष्य उपाधि जित्नु रहेको छ । म्यानमारले पनि राम्रो प्रदर्शन गरिरहेको र नेपाललाई घरेलु दर्शकको साथ रहेकाले फाइनल खेल प्रतिष्पर्धात्मक र रोमाञ्चक हुने देखिएको छ ।
प्रतिक्रिया