कुम्भमा पुण्य खोज्दै कांग्रेस नेता, गगनको शिवपूजा, देउवालाई मान पुगेन, चन्द्रले गरे आदित्यको तारिफ(भिडियो)

काठमाडौं—नेपालको दक्षिणी छिमेकी मुलुक भारतको उत्तर प्रदेश राज्यस्थित प्रयागराजमा चलिरहेको महाकुम्भ मेलामा ठूलो संख्यामा भक्तजनहरू पुगिरहेका छन् । पवित्र नदी गङ्गा, जमुना र सरस्वतीको सङ्गमस्थल प्रयागराजमा चलिरहेको महाकुम्भ मेलामा सहभागी हुन तथा स्नानका लागि विश्वका विभिन्न मुलुकका हिन्दुहरु पुग्ने क्रम जारी रहँदा नेपालबाट पनि ठूलो संख्यामा श्रद्धालु भक्तजनको भिड लागिरहेको छ । सो मेलामा सहभागी भएर पुन्य कमाउने भन्दै नेपाली नागरिकमात्रै पुगिरहेका छैनन् कि नेपालका राजनीतिक दलका नेताहरूको पनि विशेष प्राथमिकतामा परेको देखिन्छ । खास गरी संसद्को पहिलो दल नेपाली कांग्रेसका नेताहरू महाकुम्भमा डुबुल्की मार्न लर्काे लागेर प्रयागराज गइरहेका छन् । महामन्त्री गगन कुमार थापा, प्रवक्ता प्रकाशशरण महत, अर्जुननरसिंह केसी, पार्टीभित्र हिन्दु धर्मको वकालत गर्दै आइरहेका सांसद शङ्कर भण्डारी, सञ्जय गौतम, दीपक गिरी जस्ता नेताहरू प्रयागराजमा डुबुल्की मार्न पुगिसकेका छन् । बाँकी कयौं नेताहरू पनि जाने क्रममा छन् ।

बिहीबार कांग्रेस सभापति शेरबहादुर देउवा इण्डिया फाउण्डेसनले आयोजना गर्ने ‘कुम्भ ग्लोबल समिट अन डेभलपमेन्ट एण्ड सस्टेनेबिलिटी’ कार्यक्रममा सहभागी हुन प्रयागराजतर्फ जाने कार्यक्रम थियो । भारतको सत्तारुढ दल भारतीय जनता पार्टी (भाजपा) निकट रहेर थिंक ट्यांकको रूपमा काम गर्दै आएको इन्डिया फाउन्डेसन र भाजपा नेतृत्वको उत्तर प्रदेश सरकारले संयुक्त रूपमा आयोजना गरेको उक्त कार्यक्रममा देउवालाई वक्ताका रूपमा निम्त्याइए पनि अन्तिम समयमा आएर देउवाले भ्रमण रद्द गरेका हुन् । शुक्रबार र शनिबार हुने कार्यक्रममा उत्तर प्रदेशका मुख्यमन्त्री आदित्यनाथ योगीसमेत वक्ताका रुपमा सहभागी हुने तय भए पनि उनी लगायत उच्चस्तरीय राजनीतिक भेटघाट नहुने भएपछि देउवाले भ्रमण रद्द गरेको जनाइएको छ । यसले कांग्रेसी नेताहरू धार्मिक आस्थाका लागि प्रयागराज जाने भन्दा पनि योगी आदित्यनाथलाई रिझाउन सक्रिय रहेको संकेत गरेको छ ।

प्रधानमन्त्री केपी शर्मा ओलीले चाहना राखे पनि भारत भ्रमण गर्न नसकिरहेको अवस्थामा पूर्व प्रधानमन्त्रीको हैसियतमा देउवालाई गरिएको आमन्त्रणले दुई देशबीच बिग्रिएको सम्बन्ध सुधारको प्रयासको रुपमा लिइएको थियो । एमालेका अध्यक्षसमेत रहेका प्रधानमन्त्री केपी शर्मा ओलीलाई भारतले सहज रूपमा लिएको छैन । त्यसमा कांग्रेस सम्मिलित सरकारले नै चीनसँग बीआरआई फ्रेमवर्कमा सम्झौता गरेपछि भारत थप चिढिएको छ । त्यसैले चीनसँगको बीआरआई फ्रेमवर्कमा सम्झौता गरिसकेपछि बिग्रिएको सम्बन्ध भावी प्रधानमन्त्रीको समेत लिस्टमा भएका देउवाले त्यसअघि नै भारतसँगको सम्बन्ध सुधार गर्न चाहेका छन् । अहिलेको अवस्थामा भारतीय प्रधानमन्त्री नरेन्द्र मोदीसम्म पुग्न सहज बाटो भनेकै यूपीका मुख्यमन्त्री आदित्यनाथ हुन् । तर, भेटघाट नै नहुने भएपछि उक्त भ्रमण रद्द हुँदा ती सबै प्रयास असफल भएको छ । तीन पवित्र नदीको सङ्गममा डुबुल्की मार्ने देउवासहित कांग्रेसी नेताहरुको धार्मिक उद्देश्यमा राजनीतिक गन्ध पनि मिसिएको छ ।

कांग्रेसी नेताहरूले गरेको प्रयागराजको तीर्थाटन र देउवाले गर्ने भनेको स्थगित भ्रमणलाई कूटनीतिसँगै भोट र पार्टी नेतृत्वसँग पनि जोडेर हेरिएको छ । त्यसो त नेपाली कांग्रेसको नेतृत्व चयनमा विगतदेखि नै भारतको रुचि रहने गरेको र उसैले चाहेको व्यक्ति नै सभापति बन्दै आएका छन् । तर अहिले कांग्रेसमा महाधिवेशनको पनि चर्चा चुलिएको अवस्था छ । हिन्दु धर्मको एजेण्डाबाट जबरजस्त रुपमा भोटको राजनीति हुने हुँदा कांग्रेसभित्र देखिने र नदेखिने गरी हिन्दु धर्मको मुद्दा उठाउने नेताहरू पनि धेरै छन् । त्यसमा शङ्कर भण्डरीले निधारमा लगाएको टिको होस् वा गगनको निधार र शीरमा नटुट्ने चन्दन र फुललेसमेत हिन्दु धर्मको एजेन्डालाई कसरी बोकी रहेका छन् ? भन्ने पनि सङ्केत गर्छ ।