काठमाडौँ— कांग्रेसले काम गर्न नदिएकै कारण गठबन्धन फेर्ने अवस्थामा पुगेको दलील पेश गरेका प्रधानमन्त्री पुष्पकमल दाहाल प्रचण्डले नयाँ मन्त्रीसँगको सहयात्रा सुरु गरेका छन् । यदि काम गर्न मन्त्री नै बाधक थिए भने नयाँ मन्त्री आएपछि परिणाम देखिन्छ त ? भन्ने जिज्ञासा सबैको छ । अहिलेसम्म चुनौतीको चाङमा रहेका प्रचण्डका लागि केही सम्भावनाका कण समेत छन् ।
कांग्रेससँगको गठबन्धन साइनो टुंग्याउँदै एमालेसँग मिल्न पुगेका प्रधानमन्त्री पुष्पकमल दाहाल प्रचण्डले काम गर्ने हुटहुटी हुँदाहुँदै पनि कांग्रेसले सहयोग नगर्दा अस्थिर बन्नु परेको दाबी गरे । गठबन्धन फेर्नुअघि प्रधानमन्त्री मन्त्रिपरिषद्देखि संसद र प्रतिपक्षको घेराबन्दीमा थिए । अर्थात चौतर्फी चुनौतीको चाङ थियो । अब उनले भनेजस्तो समीकरण पाएका छन्, आवश्यकता ठानेरै मन्त्रीहरु पनि आएको हुनुपर्छ । विवादित मन्त्री हटाउन र उठेका प्रश्नको जवाफ दिन संसद अवरोधकै अवस्थासम्म पुगेको एमाले सत्तापक्ष बन्दा संसदको सबैभन्दा ठूलो दल कांग्रेस नै प्रतिपक्षमा रहनु प्रचण्डका लागि चुनौती बन्नसक्छ ।
प्रधानमन्त्रीले यसअघि मन्त्री नफेरेकै कारण काम गर्ने हुटहुटी हुँदा पनि गर्न नसकेको कारण सुनाएका थिए । त्यसमाथि अन्तिम समयमा कांग्रेस मन्त्री फेर्नसमेत तयार रहेको अवस्थामा माओवादीले गठबन्धन फेर्नुले प्रधानमन्त्रीमाथिका चुनौती घटेका छैनन् कि झनै बढेका छन् । यद्यपि केही सम्भावनाका ढोका समेत खुलेका छन् । यदि काम गर्नै प्रधानमन्त्रीलाई सकस परेको भए, अहिले अर्थजस्तो महत्वपूर्ण माओवादीले नै पाएको छ । अब प्रधानमन्त्री, अर्थमन्त्री, राष्ट्रिय योजना आयोगका उपाध्यक्ष डा. मिनबहादुर श्रेष्ठ माओवादीले रुचाएकै व्यक्ति हुुन् । त्यसमाथि गभर्नरमा एमालेनिकट मानिने महाप्रसाद अधिकारी छन् । एमाले सत्तामै भएका कारण अर्थतन्त्रलाई सही ट्रयाकमा ल्याउन अब बहाना बनाउने छुट प्रधानमन्त्रीलाई छैन । अब पनि बहाना बनाए उनी असफल घोषित हुनेछन् ।
त्यसबाहेक प्रचण्डका अरु पनि चुनौती छन् ।
चुनौती एकः प्रतिपक्षमा संसदकै ठूलो दल
प्रधानमन्त्री प्रचण्डका लागि सबैभन्दा ठूलो चुनौती नै कांग्रेस हो । आफू इमान्दार रहँदा पनि माओवादीले धोका दिएको निष्कर्ष निकालेको कांग्रेसले प्रचण्डलाई सहजै सत्ता हाँक्न दिनेमा संशय छ । गृह मन्त्रालयमा रवि लामिछाने लक्षित अभिव्यक्ति दिँदै कांग्रेसले दाग लागेका व्यक्ति मन्त्री पदमा बहाल रहन नहुने बताउँदै सरकारविरुद्ध कडा आवाज उठाउने संकेत दिइसकेको छ ।
चुनौती दुईः जनतामा छाएको निराशा र सडक आन्दोलन
सत्ता सञ्चालकहरुले जतिसुकै दाबी गरेपनि सुशासनको अनुभूति गर्नेगरी सरकारले काम गर्न सकेको छैन । जनतामा चरम निराशा छ । युवापुस्ताले देशमा सम्भवना देख्नै छाडेका छन् । देश प्रेम घट्दो छ । यो निराशा निमिट्यान्न पार्नु सरकारको चुनौती हो । त्यसमाथि लघुवित्त, सहकारी, मिटरब्याज पीडित सडकमा छन् । समस्या समाधान भएको दाबी गरिए पनि फेरि बल्झिने अवस्था छ । सरकार आफ्ना वाचा र निर्णयमा अडिन नसके दुग्ध किसानसहित किसान आन्दोलन थप चर्किने पक्का छ ।
चुनौती तीनः आन्तरिक सन्तुलन
कांग्रेस र माओवादी जस्तो भिन्न विचार भएकोभन्दा अहिलेको गठबन्धनमा कम्युनिस्ट विचारधारा बोकेका धेरै दल छन् । तर महत्वपूर्ण मन्त्रालय लिएको रास्वपाले फरक विचार राख्छ । ती विचारलाई एकीकृत गर्दै मन्त्रिमण्डलको अध्यक्ष प्रधानमन्त्री भएकाले मन्त्रीहरुलाई आफूअनूकुल हिँडाउन समस्या पर्नेछ । दलीय स्वार्थको टकरावमा पनि प्रचण्ड पर्नेछन् । त्यसकारण अर्थ, गृह, परराष्ट्र, शिक्षा लगायतका महत्वपूर्ण मन्त्रालय अग्नि परीक्षामा छन् ।
चुनौती चारः प्रदेश सरकारको स्थायित्व र उठेका प्रश्न
सत्ता समीकरण फेरिएसँगै प्रदेश सरकारहरु अस्थिरताको केन्द्र बन्दैछन् । प्रदेश संरचनामाथि नै प्रश्न उठिरहेका बेला यस्ता गतिविधिले संविधान र व्यवस्थाकै बदनामी भइरहेको छ । केही प्रदेश त मध्यावधिकै बाटोमा हिँडिसकेका छन् । त्यसबाट संविधानको मसिहा मान्ने माओवादी र प्रचण्डलाई चुनौती छ ।
चुनौती पाँचः उपनिर्वाचन सिट बाँडफाँट
आगामी वैशाखमा इलाम–२ मा उपनिर्वाचन हुँदैछ । त्यस क्षेत्रमा यसअघिको गठबन्धनबाट कांग्रेसले उम्मेदवार उठाएको थियो । एमालेको पकड क्षेत्रमा झलनाथ खनाललगायत आकांक्षी छन् । यस्तो अवस्थामा एमालेले लिने वा माओवादीलाई दिने भन्नेबारे सकस पर्न सक्छ । यद्यपि यो सत्ताका लागि मात्रै बनेको समीकरण हो वा चुनावमै गठबन्धन हुन्छ त्यो भने स्पष्ट भएको छैन ।
चुनौती छः कर्मचारीतन्त्र र विवादित मुख्यसचिव
मुख्यसचिव वैकुण्ठ अर्याल टेरामक्स प्रकरणमा मुुछिएका छन् । अख्तियारले पनि उनीमाथि अनुसन्धान थालेको छ । प्रचण्डले मुख्यसचिवलाई भेटेरै राजीनामा दिन सुझाइसके पनि आर्यालले मानेका छैनन् । त्यसमाथि काम बिग्रिनुमा नेताभन्दा बढी कर्मचारीतन्त्र जिम्मेवार भएको भन्दै पटक–पटक दिने प्रधानमन्त्रीका अभिव्यक्तिले उनीहरुकै असहयोगको हद नाघे के होला भन्ने चुनौती पनि प्रधानमन्त्रीमाथि छ ।
चुनौती सातः संक्रमणकालीन न्याय
१७ वर्षदेखि राजनीतिक स्वार्थबाट आफँै अन्यायमा परेको संक्रमणकालीन न्याय आफ्नै कार्यकालमा टुंग्याउने प्रचण्डको चाहना छ । तर, सत्तापक्ष र गठबन्धनमा भएको दलले सहमति जनाउने र प्रतिपक्षमा रहनेले विरोध गर्ने परिपाटी नै बनेको छ । त्यसकारण अहिले कांग्रेसले त्यसमा अड्को थाप्न सक्छ ।
आफूमाथि राजनीतिक संकट देखिँदा व्यवस्थाको चिन्ता गर्ने प्रचण्डलाई संविधान र व्यवस्थाप्रति सर्वस्वीकार्य धारणा बनाउने र थाती रहेका महत्वपूर्ण विधेयक यथासक्य चाडो टुंग्याउनु अर्को महत्वपूर्ण चुनौती र कार्यभार छ । यत्तिका चुनौतीको सामना गर्ने सार्मथ्य प्रचण्डले नराखे उनको सत्ता लम्ब्याउने नाटकको कणकणमा प्रश्न र पाइला पाइला चुनौतीका चाङ रहनेछन् ।
प्रतिक्रिया