युक्रेनका लागि अमेरिकाले छान्यो अनुभवी राजदूत

काठमाडौँ — अमेरिकाले अनुभवी कूटनीतिज्ञ ब्रिजेट ब्रिंकलाई युक्रेनको राजदूत बनाएको छ । यसअघि अमेरिकी राष्ट्रपति कार्यालय ह्वाइट हाउसले ब्रिंकले आगामी दिनमा विगत तीन वर्षदेखि खाली रहेको महत्वपूर्ण पद सम्हाल्ने घोषणा गरेको थियो ।

अमेरिकाले युक्रेनलाई रुससँग लड्न सकेसम्मको सहयोग दिने वचन दिएको छ । सोही अनुसार विभिन्न चरणमा उसले सहयोग उपलब्ध पनि गराइरहेको छ । यस्तो अवस्थामा अमेरिकाले युक्रेनका लागि कूटनीतिमा २५ वर्षको अनुभव भएकी ब्रिंकलाई चुनेको हो ।

ब्रिंकले अहिले स्लोभाकियाको लागि अमेरिकी राजदूतको रुपमा काम गरिरहेकी छिन् । ह्वाइट हाउसले ब्रिंकसँग कूटनीतिक क्षेत्रमा लामो अनुभव भएकाले युक्रेनको इतिहासकै महत्वपूर्ण समयमा यो पदका लागि उनी योग्य रहेको बताएको छ ।