‘बैंकको काम कारबाहीले अर्थतन्त्रलाई थप जटिलतातर्फ धकेल्न खोज्यो’

काठमाडौँ – नेपाल राष्ट्रिय व्यवसायी महासङ्घका अध्यक्ष नरेश कटुवालले बैंकको पछिल्लो काम कारबाहीले अर्थतन्त्रलाई थप जटिलतातर्फ धकेल्न खोजेको आरोप लगाएका छन् । कटुवालले शुक्रबार एक विज्ञप्ति जारी गर्दै यस्तो बताएका हुन् ।

पछिल्लो समय बैंकले तरलता अभावका बहानामा उद्योगी व्यवसायीलाई ऋण अड्काउने, मनपरी ढङ्गले ब्याजदर बढाए पछि अध्यक्ष कटुवालले विज्ञप्ति मार्फत त्यसको विरोध गरेका हुन् । उनले बैंकको बढेको ब्याजदर तत्काल फिर्ता लिन पनि माग गरेका छन् । उनले बैंक तथा वित्तीय संस्थाले लगानीयोग्य रकम (तरलता)को बहानामा ऋणको ब्याजदर अचाक्ली बढाएको भन्दै उक्त ब्याजदर तत्काल फिर्ता लिन माग गरेका हुन् ।

“बैंकको पछिल्लो काम कारबाहीले अर्थतन्त्रलाई थप जटिलतातर्फ धकेल्न खोजेको छ”, अध्यक्ष कटुवालले जारी गरेको विज्ञप्तिमा उल्लेख गरेका छन् । उनले कोरोनाका कारण निकै अप्ठ्यारो अवस्थामा परेको उद्योग व्यवसाय पुनःबैंकको ब्याजदरका कारण समस्या खेपिरहेको बताए । उद्योग व्यवसाय गर्नेहरुले अहिले बैंकबाट सहज तरिकाले ऋण पाउन सक्ने अवस्था नभएको उनको भनाइ छ ।