छुट्टाछुट्टै स्थानमा तीन जना मृत फेला

काठमाडौँ – काठमाडौं, दैलेख र सोलुखुम्बुमा तीनजना मृत अवस्थामा फेला परेका छन् । काठमाडौँको जयवागेश्वरीस्थित सडकपेटीमा हाल वतन नखुलेका ६५ वर्षीय विनोद भनिने पुरुष आज मृत अवस्थामा फेला परेका छन् ।

त्यस्तै दैलेखको दुल्लु नगरपालिका–११, भुकाँ बस्ने ५५ वर्षीय जयबहादुर थापा दुल्लु–११ र नारायण नगरपालिका–९, छामघाटमा पर्ने खोलामा शनिबार मृत अवस्थामा फेला परेका छन् ।

सोलुखुम्बुको माप्य दूधकोशी गाउँपालिका–६, वाकु बस्ने ६८ वर्षीय तपिराज राई आफ्नै घरदेखि करिब एक किलोमिटर टाढा बारीमा शनिबार मृत अवस्थामा फेला परेका छन् । बारीमा बाँधिराखेको गोरुलाई पानी खुवाउने र सार्ने भनी गएकोमा घर नफर्किएपछि खोजी गर्ने क्रममा सोही बारीमा उनको शव फेला परेको जनाइएको छ ।