हिन्दू नारीहरुले ऋषिपञ्चमी मनाए

काठमाडौँ – आज ऋषिपञ्चमी, अरुधन्तीसहित सप्तर्षिहरुको पूजा आराधना गरी मनाइएको छ । आजका दिन कश्पय, अत्रि, भारद्वाज, विश्वमित्र, गौतम, जमदग्नी, वशिष्ठ र अरुधन्तीको पूजा गरेर वैदिक सत्य सनातन हिन्दू धर्मावलम्बी महिलाहरुले व्रत बस्ने गर्दछन् ।

आजको दिन बिहानै उठेर नदी, तलाउ, पोखरी, कुवार वा धारोमा गइ स्नान गरी शुद्ध हुँदै स्नानका बेला ३६५ वटा दत्तिवनले दाँत माझ्ने, गाईको गोबर, माटो र खरानी लगाएर स्नान गर्ने धार्मिक विधि रहेको छ । आज महिलाहरु काठमाडौंको गैरीघाट लगायत देवीदेवताका मन्दिरमा गएर सप्तर्षिहरुको पूजा गरी व्रत बसेका छन् । आजको दिन सप्त ऋषिहरुको पूजा गर्नाले रजस्वला भएको बेला छोएइको त्रुटिसहित आफ्ना कुकर्महरुबाट मुक्ति मिल्ने धार्मिक विश्वास रहेको छ । सप्त ऋषिहरुको पूजा गर्ने दिन भएकोले आजको दिनलाई ऋषिपञ्चमी भनिएको हो ।