माधव नेपाल काँग्रेस र माओवादीको मल बन्न गए : महेश बस्नेत

काठमाडौँ – प्रमुख प्रतिपक्ष दल नेकपा एमालेका नेता महेश बस्नेतले माधव कुमार नेपाल काँग्रेस र माओवादी केन्द्रको मल बन्न गएको बताउनुभएको छ ।

शुक्रबार रिपोर्टर्स क्लवमा आयोजित कार्यक्रममा नेता बस्नेतले माधव कुमार नेपाल माओवादी र कांग्रेसको मल बन्न गएको बताउनुभएको हो । उहाँले नेता नेपालले पार्टीमा गरेको गद्दारी र आपराधिक कर्म इतिहासमा गम्भीर समस्या बन्ने बताउनुभयो । नेता बस्नेतले पार्टीको ह्वीप उल्लंघन गर्ने केही मान्छेहरु चोइटिएर गएको नै उचित हुने कार्यकर्ताको भनाइ रहेको बताउनुभयो ।

उहाँल भन्नुभयो, “आम कार्यकर्ताहरुले ल्याङल्याङ हुनुभन्दा केही मान्छेहरु चोइटेर गएकै ठीक छ भन्ने भूमिका खेल्नुभएको छ, जसरी वसन्त ऋतुमा रुखहरुले पात फेर्छ, र मात्रै पालुवा आउँछ, हामी त रुखको पात झरेपनि त्यसैको मल बनोस् भन्ने हो, रुखहरुको पात त झर्यो तर एमालेको होइन, माओवादी र कांग्रेसको मल बन्न जानुभयो माधव नेपाल, उहाँले गरेका गद्दार र आपराधिक कर्म इतिहासको गम्भीर समस्या हुनेछ, कहिलेकाहीँ गाई दुन जाँदा दूध पोखिन्छ, तर बुढापाकाहरु दूध कि बाछाको मुखमा परोस् कि थुनमै रहोस् भन्ने उखान गर्छन्, दूध पोखियो भने त्यसको महत्व हुँदैन ।”

नेता बस्नेतले नेपालको राजनीतिमा दुई दलीय व्यवस्था हुन आवश्यक रहेको औँल्याउनुभयो । स–साना पार्टीहरु मिलाएर नेकपा एमाले र नेपाली कांग्रेस मात्र बनाएपछि स्थिरता हुने र मात्रै देशको विकास हुने उहाँले बताउनुभयो ।

उहाँले भन्नुभयो, “नेपालको राजनीतिमा जसरी अमेरिका र बेलायतमा दुई दलीय सिस्टम छ, नेपालमा पनि दुई दलीय व्यवस्था गर्यो भने राजनीतिक स्थिरता हुन्छ, साना दलहरुलाई एकीकरणको माध्यमबाट एमाले र कांग्रेसको रुपमा विकास गर्ने जनचाहना देखिन्छ, राजनीतिक स्थिरमा दुई दलीय व्यवस्था हो, राजनीतिक स्थिरता बिना विकास हुँदैन भन्ने जनताको चाहना छ ।”

नेता बस्नेतले अहिले नेपाली कांग्रेस लुम्बिनी र गण्डकीमा सरकार बन्यो भने खुशीयाली मनाइरहेको र लड्डु खाइरहेको तर सरकार कसरी बनेको छ त्यसमा विचार नगरेको बताउनुभयो । उहाँले दीपक मनाङे र विमला वलीलाई कसरी परिचालन गरिएको छ भन्ने सबैलाई थाहा भएको पनि बताउनुभयो ।

उहाँले भन्नुभयो, “लुम्बिनी र गण्डकीमा सरकार बन्यो भनेर साथीहरुले खुशीयाली मनाइरहनुभएको छ, लड्डु खाइरहनुभएको छ, कुन हालतमा सरकार बनेको छ, दीपक मनाङे जस्ता साथीहरुलाई कुन ढंगले प्रायोजित गरिरहनुभएको छ, विमला वली जस्ता साथीहरुलाई कस्तो दबाव दिइएको छ, यो साक्षात्कार नै छ ।”

नेता बस्नेतले प्रधानमन्त्री तथा कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल र सभामुख अग्नीप्रसाद सापकोटाले गरेको अपराध नेपालको इतिहासमा धब्बाको रुपमा रहने बताउनुभयो । उहाँले नेकपा एमाले फुटाउनका लागि देउवा, प्रचण्ड र सभामुख नै लागिपरेको उल्लेख गर्दै एमाले आउँदो निर्वाचनमा सशक्त पार्टीको रुपमा स्थापित हुने र बहुमतको साथमा आउने उल्लेख दाबी गर्नुभयो ।