निषेधाज्ञा जारी हुने जिल्लाको सख्या २४ पुग्यो

काठमाडौँ – कोरोना महामारीको दोस्रो लहर तीब्र रूपमा बढेसँगै काठमाडौँ उपत्यकासहित देशका विभिन्न जिल्लामा निषेधाज्ञा जारी भइरहेको छ ।
गृह मन्त्रालयका अनुसार हालसम्म २४ वटा जिल्लामा निषेधाज्ञा जारी गरिएको छ । ती मध्ये चार जिल्लामा आंशिक र बाँकी जिल्लाभर निषेधाज्ञा गरिएको छ । सरकारले संक्रामक रोग नियन्त्रण ऐन २०२० को उपदफा २ बमोजिम पहाडी र हिमाली जिल्लामा दुई सय र काठमाडौँ उपत्यका तथा तराईमा पाँच सय सक्रिय संक्रमित रहेका जिल्लामा जिल्लाभर वा निश्चित क्षेत्रमा प्रमुख जिल्ला अधिकारीले निषेधाज्ञा तथा आवश्यक आदेश जारी गर्नसक्ने अधिकार दिएको छ । संक्रमितको संख्या ह्वात्तै बढेपछि नियन्त्रण चुनौतीपूर्ण बनेको छ । विज्ञहरूले सचेतना अपनाउन आग्रह गर्दै आएका छन् ।