जेनजीलाई हराउन संसद ब्युँताउने खेलमा देउवा–ओली, सर्वोच्च र सुशीलामाथि दबाब, चुनाव भाँडिने त्रास (भिडियोसहित)

काठमाडौं— निजामती सेवाबाट अलग भई स्वायत्त संसद् सेवा गठन भएको स्मरणमा हरेक वर्षको मङ्सिर २८ गते अर्थात् आइतबार विभिन्न कार्यक्रमका साथ १९औँ संघीय संसद् सेवा दिवस मनाइएको छ । वि.सं. २०५८ मा निजामती सेवाबाट संसद् सेवा गठन भएको थियो । नेपालको संविधानको धारा २०७ मा संघीय संसद्को कामकारबाही सञ्चालन तथा व्यवस्थापन गर्न एक सचिवालय रहने र त्यस्तो सचिवालयको स्थापना तथा त्यससम्बन्धी अन्य व्यवस्था संघीय कानुनबमोजिम हुने व्यवस्था छ । निजामती सेवा ऐनबाट निकालेर छुट्टै ऐनद्वारा सञ्चालित संसद् सेवा विशिष्ट, स्वायत्त र व्यावसायिक सेवा हो । संसदीय अभ्यासलाई थप प्रभावकारी, मर्यादित र व्यावसायिक बनाउन छुट्टै ऐनद्वारा संसद् सेवाको गठन गरिएको स्मरणमा यो दिवस मनाउने गरिएको हो । तर, गत भदौ २३ र २४ को आन्दोलनपछि पूर्वप्रधानन्यायाधीश सुशीला कार्की नेतृत्वमा बनेको सरकारले संसद् विघटन गरेको छ । सरकारको सिफारिसमा राष्ट्रपति रामचन्द्र पौडेलले प्रतिनिधि सभा विघटन गरी आउँदो फागुन २१ गते प्रतिनिधि सभा निर्वाचनको मिति घोषणा गरेका थिए । प्रतिनिधि सभा विघटनलाई सबै राजनीतिक दलले असंवैधानिक भन्दै आएका छन् । एमाले निरन्तर संसद् ब्युँताउन लागिपरेको छ भने एमालेपछि कांग्रेस पनि संसद् पुनःस्थापनको मुद्दा लिएर सर्वोच्च अदालत पुगेको छ । अहिले संसद् विघटनविरुद्ध १८ वटा रिट सर्वोच्च अदालतमा विचाराधीन छन् । पूर्वप्रधानमन्त्री तथा एमाले अध्यक्ष केपी शर्मा ओलीले प्रतिनिधिसभा विघटन अस्वीकार्य भएको भन्दै फागुन २१ को निर्वाचनअघि जुनसुकै हालतमा संसद् ब्युँताउन दबाब दिइरहेका छन् । एमालेको ११औँ महाधिवेशनलाई सम्बोधन गर्ने क्रममा ओलीले डर, दबाब र प्रतिशोधको वातावरणमा गरिने चुनावले लोकतन्त्रलाई कमजोर बनाउने भन्दै संविधानलाई ‘लिकमा फर्काउने’ एकमात्र बाटो संसद् पुनःस्थापना भएको स्पष्ट पारे । आइतबार संघीय संसद् सेवा दिवस–२०८२ को अवसरमा आयोजित कार्यक्रममा सभामुख देवराज घिमिरेले संसद्लाई सरकारले बन्देज लगाएको र कर्मचारीहरूको सेवा, सुविधा र दरबन्दी घटाउने काम गरेकोमा असन्तुष्टि व्यक्त पोखे । जनउत्तरदायी, सक्षम र मर्यादित संसदीय अभ्यासलाई पुनर्जीवित गर्नुपर्नेमा सभामुखको जोड छ ।