अनौठो अपराध, सुटकेसमा २६ वर्षीया महिलाको शव, बमको डरमा प्रहरी रातभर जागा, अनि खुल्यो पोल (भिडियोसहित)

काठमाडौं— शनिबार राति करिब १० बजे रौतहट जिल्लाको प्रहरी चौकी बेलबिछुवाका प्रहरी सहायक निरीक्षकलाई सूचना आउँछ— गौर–सिरसिया सडकखण्डको गौर नगरपालिका–९ स्थित मुडवालगेट नजिक सडकमा डोरीले बाँधिएको एउटा सुटकेस बेवारिसे अवस्थामा छ । सो सूचनापछि प्रहरी चौकी बेलबिछुवाको टोली घटनास्थल पुग्छ । सूचनामा भनिएजस्तै एउटा ठूलो निलो रङको सुटकेस बाहिरबाट डोरीले बाँधिएको अवस्थामा सडक छेउमा राखिएको थियो । रातिको समय र शंकास्पद वस्तु भएकाले प्रहरीले कुनै विस्फोटक पदार्थ हुनसक्ने आशंकामा रातभर सुटकेसलाई सुरक्षा दिएर राख्छ । आइतबार बिहानै जिल्ला प्रहरी कार्यालय रौतहटका डीएसपी राजु कार्की सहितको टोलीले स्थानीय तथा वडाका प्रतिनिधिको रोहबरमा सुटकेस खोल्दा सबै चकित पर्छन् । सुटकेसभित्र एक महिलाको शव थियो, जसको नाकबाट सामान्य रगत बगेको थियो र हातखुट्टा खुम्च्याएर कपडा पट्याइए जस्तो मिलाएर राखिएको थियो ।