काठमाडौं— काठमाडौं महानगरका प्रमुख बालेन शाहका पूर्वसल्लाहकार समेत रहेका रुपन्देहीका सन्तोष गिरीले आगामी कार्तिक १७ गते हुने रूपन्देही–३ को उपनिर्वाचनमा स्वतन्त्र उम्मेदवारी दिने तयारी गरेका छन । देश परिवर्तनको लागि नेतृत्वमा प्रतिबद्धता, दूरदृष्टि र इमानदारीको आवश्यकता भइरहेको अवस्थामा नयाँ पुस्ताले राजनीतिमा नेतृत्व लिनुपर्ने समय आइसकेको सन्देशसहित सन्तोष गिरीले राजनीतिक यात्रा अघि बढाएका हुन । औपचारिक उम्मेदवारी घोषणा नगरे पनि स्वतन्त्र उम्मेदवार बन्ने उद्देश्यसहित मतदाताको घरदैलोमा रहेका गिरीले आफ्नो फेसबुकमार्फत यस्तो सन्देश दिएका छन् ।
तिलोत्तमा निवासी गिरी युवाहरुबीच बौद्धिक, सरल र मृदुभाषी नेताको रूपमा परिचित छन्। हाल गिरी आफ्नो क्षेत्रका मतदातासँग निरन्तर भेटघाटमा व्यस्त छन्। उद्योगी–व्यवसायी, विभिन्न दलका स्थानीय नेताहरू, सामाजिक तथा व्यवसायिक संघसंस्थाका प्रतिनिधिहरू, खेलकर्मी र सर्वसाधारणहरूसँग प्रत्यक्ष संवाद गर्दै सुझाव र गुनासोहरू सुन्दै छन ।
भैरहवाका युवा उद्यमी राजकुमार गुप्ताले उम्मेदवारका आकाक्षीं सन्तोष गिरीले मतदाताको मन जित्न थालेको बताए । दलहरुले जनभावना अनुसार काम नगर्दा मतदाताले विकल्प खोजिरहेको उनले बताए । गिरीले जनतामाझ प्रस्तुत गर्ने स्पष्ट योजना र क्षेत्रगत विकासको दृष्टिकोणले चुनावी माहोललाई तिब्रता दिएको उद्यमी गुप्ताको भनाई छ ।
गिरीले शुद्धोधन गाउँपालिका–६ को गुरौली र वडा नम्बर १, बेलवा जोड्ने पुलको निरीक्षण गर्दै त्यहाँको समस्या उजागर गरेका छन । १३ वर्षअघि करोडौंको लगानीमा बनेको उक्त पुल अहिलेसम्म प्रयोगमा नआएको र दुबै छेउको बाटो नजोडिनु, पुलको डिजाइनमा त्रुटि र योजना साटासाट जस्ता प्रणालीगत बेथितिका कारण यो अवस्था आएको गिरीको भनाइ छ ।
गिरी पछिल्ला दिनमा मतदातासँग प्रत्यक्ष संवाद, सुझाव संकलन र जनताका समस्या सुन्ने अभियानमा छन्। “अब जनतालाई केवल आश्वासन होइन, जनजीवनमा प्रत्यक्ष प्रभाव पार्ने नीति र योजनाहरू चाहिन्छ”, गिरी बताउछन् ।
गिरीको अभियानले अहिले क्षेत्रको चुनावी माहोलमा नयाँ बहस र चासो ल्याएको छ । स्थानीय तहमा दलहरूप्रति वितृष्णा बढिरहेको सन्दर्भमा गिरीको स्वतन्त्र उम्मेदवारी तयारीले दलहरूलाई सशकिंत बनाएको छ ।
प्रतिक्रिया