सरकारको कार्यशैलीलाई लिएर सत्तापक्षका नेतानै असन्तुष्ट

काठमाडौं—नेपाली कांग्रेसका नेता डा. शेखर कोइरालाले वर्तमान सरकारको कार्यशैलीलाई लिएर असन्तुष्टि पोखेका छन् । अहिलेको देशको परिस्थीति अत्यन्तै नाजुक रहेको उनको टिप्पणी छ ।

साहित्यिक पत्रकार संघले आइतबार काठमाडौंमा आयोजना गरेको सर्जक सुमन कर्मचार्यको ‘कात्रोमा खल्ती’ अनाख्यानको लोकार्पण कार्यक्रममा कोइरालाले देशको राजनीति, आर्थिकलगायतका क्षेत्र अत्यन्तै नाजुक रहेको बताए । बिचौलियाको बिगबिगी हरेक क्षेत्रमा देखिएको उनको जिकिर छ ।

कोइरालाले कांग्रेस–एमालेबीच सरकार बन्दा संविधान संशोधन वा सुधार गर्ने भनिएपनि ९ महिना बित्दा पनि त्यसमा ध्यान दिन नसकेको उनको भनाइ छ । राष्ट्र बैंकको गभर्नर नियुक्त गर्न पनि बिचौलियाको चलखेलको कुरा आएको भन्दै कोइरालाले बिचौलियाको चलखेलमा गभर्नर नियुक्त गरे नेपालकै लागि दुर्भाग्य हुने बताए ।