रवीन्द्र मिश्र र धवलशमशेरसहित ४१ जनाविरुद्ध ६ दिनको म्याद थप

काठमाडौं—राजावादीको हिंसात्मक प्रदर्शनमा संलग्न भएको आरोपमा पक्राउ परेका राप्रपाका वरिष्ठ उपाध्यक्ष रवीन्द्र मिश्र र महामन्त्री धवलशमशेर राणासहित ४१ जनाविरुद्ध जिल्ला अदालत काठमाडौंले ६ दिनको म्याद थप गरेको छ ।

उनीहरुमाथि अनुसन्धानका लागि अदालतबाट थप ६ दिन थुनामा राख्न जिल्ला न्यायाधीश ढाकाराम पौडेलको इजलासले आज देश दिएको हो । काठमाडौं जिल्ला अदालतका श्रेस्तेदार तीर्थराज भट्टराईका अनुसार मंगलबार पक्राउ परेकाहरुलाई भने ७ सात दिन थुनामा राख्न अनुमति दिइएको छ ।

तीनकुनेबाट पक्राउ परेका उनीहरूविरुद्ध पहिलो पटक ५ दिन हिरासतमा राख्न अदालतले अनुमति दिएको थियो । प्रहरीका अनुसार राणा र मिश्रसहित ११ जनालाई राज्यविरुद्धको कसुरसहित आपराधिक उपद्रव र संगठित अपराधसम्बन्धी कसुरअन्तर्गत अनुसन्धान भइरहेको छ ।

हिंसात्मक प्रदर्शनमा संलग्नमध्ये १ सय १२ जनालाई प्रहरीले पक्राउ गरे पनि स्वागत नेपाललगायत ८१ जनालाई सामान्य सोधपुछपछि प्रहरीले हाजिरी जमानीमा छाडेको छ । तीनकुनेमा राजावादीले गरेको प्रदर्शनले हिंसात्मक रूप लिँदा दुई जनाको ज्यान गएको थियो । घटनामा ५५ प्रहरी, २२ सशस्त्र प्रहरी र ५२ जना प्रदर्शनकारीसहित १ सय २९ जना घाइते भएका थिए ।