मिश्र र धवलको हिरासत दैनिकी : नेता भेट्छन्, छुटाउन दबाब दिन्छन्, के खान्छन् ?

काठमाडौंको तीनकुनेमा चैत १५ गते राजावादी समूहको आन्दोलनमा अराजक गतिविधि गरेको आरोपमा प्रहरीले थप २४ जनालाई पक्राउ गरेको छ । सो घटनामा संलग्नहरू पक्राउ पर्नेक्रम जारी छ । यसअघि राप्रपाका वरिष्ठ उपाध्यक्ष रविन्द्र मिश्र र महामन्त्री धवलशमशेर जबरासहित १११जना पक्राउ परेका थिए । उनीहरुमध्ये ४१ जनालाई म्याद थप गरेर प्रहरीले अनुसन्धान गरिरहेको छ ।

विवेकशील साझा पार्टी हुँदै राजावादी बनेका बीबीसी नेपाली सेवामा लामो समय काम गरेका पूर्वपत्रकार रविन्द्र मिश्र आफ्नै बोली र हर्कतका कारण प्रहरी हिरासत पुगेका छन् । उनीसंगै राप्रपाका सांसद धवलशमशेर जबरा पनि प्रहरीको नियन्त्रणमा छन् ।

मिश्र र धवलसहित अन्यसयभन्दा धेरैलाई चैत १५ गते तीनकुनेमा भएको अराजकगतिविधिमा संलग्न रहेको आरोपमा काठमाडौं प्रहरी परिसरले पक्राउ गरेर अनुसन्धान गरी मुद्दा चलाउने तयारी थालेको छ । गत शुक्रवार पक्राउ परेकाहरुलाई आइतबार जिल्ला अदालत काठमाडौंबाट अनुसन्धानकालागि प्रहरीले पाँच दिन हिरासतमा राख्ने अनुमतिपाएको छ । म्याद थपका लागि अदालत लैजाँदै गर्दा मिश्रको हातमा हतकडी र जिउमा थुनुवाको पहिरन लगाएको दृश्यले उनीमाथि प्रहरीले गरेको व्यवहार छर्लंग पारेको छ । प्रहरीले मिश्र र महामन्त्री धवलशमशेरसहित ११ जनाविरुद्ध राज्यविरुद्धको कसुरमा मुद्दा चलाउने गरी अनुसन्धान गरिरहेको छ । त्यस्तै, आपराधिक उपद्रव र संगठित अपराधमा ४१ जनाविरुद्धअनुसन्धान गर्न प्रहरीले अनुमति पाएको छ । अदालतले पहिलोपटक अनुमति दिएको समय मंगलबार सकिँदैछ भने अब बुधबार म्याद थपका लागि पुनः अदालतमा उपस्थित गराउने प्रहरीको तयारी छ ।

राजतन्त्र पक्षधरहरुले दुर्गा प्रसाईंलाई कमान्डर तोकेर तीनकुेनमा आयोजना गरेको सभा तथा प्रदर्शनमा प्रहरी र प्रदर्शनकारीबीच झडप भएको थियो । प्रदर्शनकारीमाथि प्रहरी दमन भएको भन्दै राजावादीहरुले उग्ररुप देखाउँदा एक पत्रकारसहित दुई जनाको ज्यान गयो भने सरकारी तथा व्यक्तिका निजी सम्पत्तिमाथि आगजनी र तोडफोडका घटना भए । यसक्रममा सुरक्षाकर्मीसहित दर्जनौँ प्रदर्शनकारी घाइते भएका छन् । आक्रोशित बनेका राजावादी प्रदर्शनकारीले सञ्चारगृह तथा पार्टी कार्यालयमा समेत आक्रमण गर्न भ्याए । जुन कार्यमा मिश्रर धवलले युवाहरुलाई उक्साएको आरोपका आधारमा पक्राउ गरेको प्रहरीको भनाइ छ । चैत १५ गते तीनकुनेमा राप्रपाका वरिष्ठ उपाध्यक्ष मिश्र र महामन्त्री धवलशमशेरले युवालाई उत्तेजित पार्न दिएको यो अभिव्यक्ति सुन्नुहोस् ।

पूर्वराजाले घिउ खाएर मेरो हात सुङ सुङ भन्ने समय गयो भन्दै कुनै समय राजा र राजतन्त्रको कट्टर विरोधी रहेका मिश्र हाल जिउज्यान दिएरराजतन्त्र फर्काउने अभियानमा लागेका छन् । तर मिश्र जस्ताको शैली र हर्कतले राजा आउनेभन्दा पनि अवस्थालाई झनै संकटतर्फ धकेल्ने काम भएको विश्लेषण हुन थालेको छ । तीनकुनेको घटना निर्मल निवासमा बसेका पूर्वराजा ज्ञानेन्द्र शाहका लागि टाउको दुखाईंको विषय बनेको छ । शुक्रबार राति पक्राउ परेका मिश्र र धवलशमेशरलाई फरक फरक कोठामा राखिएको थियो । मिश्रलाई भने अन्य थुनुवासँगै राखिएको थियो । भोलिपल्ट मिश्रले धवलशमशेरलाई छुट्टै कोठामा र आफूलाई भने अन्य थुनुवासँगै राखिएको विषयमा गुनासो गरेका थिए ।

अन्य थुनुवासँगै राखिदा आफूलाई डिस्टर्ब भएको भन्दै मिश्रले गुनासो गरेपछि धवललाई राखिएकै कोठामा प्रहरीले सारेको थियो । त्यसपछि अहिले मिश्र र राणा एउटै कोठामा रहेको प्रहरीले जनाएको छ । उनीहरुसँगै पक्राउ परेकाहरुलाई भने अन्य थुनवासँगै राखिएको छ । मिश्र र धवललाई अस्पताल बस्ने सुविधा दिइए पनि उनीहरुले त्योे नलिने बताएका छन् । मिश्रले हिरासतमा पत्रिका र पुस्तक पढेर बस्ने गरेका छन् । मिश्र र राणाले दिनभर आफन्त तथा पार्टीका नेता कार्यकर्तासँग भेटघाटमै समय बिताउने गरेका छन् । उनीहरुले प्रहरीकै क्यान्टिनको खाना खाने गरेका छन् । धवलशमशेरले भने काजु र स्याउ पनि मगाएका छन् । यसक्रममा धवलशमशेरले भने आफ्नो आधिकारिक फेसबुक पेजमार्फत आफ्नो चिन्ता नर्गन सुभेक्षुक तथा सुभचिन्तकहरुलाई आग्रह गरेका छन् ।

तीनकुने घटनामा राप्रपा नेतासहित पूर्वराजा समर्थकहरु पक्राउ परिरहेको अवस्थामा राजतन्त्र पक्षधरहरुले भने सो घटनामा सरकारमाथि नै आरोप लगाएका छन् । तीनकुनेको आन्दोलनमा हिंसा भड्काउने मुख्य व्यक्ति वर्तमान प्रधानमन्त्री भएको संयुक्त जनआन्दोलन परिचालन समितिका प्रवक्ता स्वागत नेपालको दाबी छ । चैत्र १५ गतेको कार्यक्रम हुनु पूर्व वर्तमान प्रधामन्त्री केपी शर्मा ओलीले एमालेको भ्रातृसंगठन युवासंघलाई बाघले झै झम्टिनु भनेर आदेश दिएको भिडियो प्रमाण सामाजिक सञ्जालहरुमा भएको उनीहरुको दाबी छ ।

तीनकुने घटनाका सन्दर्भमा स्वतन्त्र नागरिकहरुको विज्ञ छानविन समिति बनाउनु पर्ने र त्यस घटनाको सत्य तथ्य बाहिर ल्याउनु पर्ने काननुविदहरुको तर्क छ । तीनकुने घटनामा जो कोही व्यक्ति, संस्था, प्रहरी, राज्य दोषी भए पनि कानुनी दायरामा ल्याउनु पर्ने उनीहरु बताउँछन् ।

राजतन्त्र पक्षधर तथा राप्रपासहितले सरकारकै कारण तीनकुने घटना भएको दाबी गर्दै आएका छन् । त्यसो त सरकारले समेत आन्तरिक रुपमा यस घटनाको छानबिन गरिरहेको र आवश्यक कदम चाल्ने बताइसकेको छ । यद्यपि, राजतन्त्र र गणतन्त्र पक्षधरबीच बढ्दो टसलले आन्दोलन हिंसात्मक बन्दा त्यसको मारमा भने आम सर्वसाधारण नागरिक नै परेका छन् । तीनकुने घटनाका कमान्डर दुर्गा प्रसाईं भने हाल फरार छन् । प्रहरीले उनको खोजी कार्य तीव्र बनाए पनि पक्राउ गर्न सकेको छैन ।