व्यक्तित्व विकास गर्न वृत्ति मार्गनिर्देशन सेवा इकाइ स्थापना

काठमाडौं – कागेश्वरी मनोहरा नगरपालिकामा वृत्ति मार्गनिर्देशन सेवा इकाइ स्थापना गरिएको छ । विद्यार्थीहरूको व्यक्तित्व विकास गर्ने उद्देश्यले आइतबार एक कार्यक्रम गरी नगरपालिकाका प्रमुख उपेन्द्र कार्कीले इकाइको उद्घाटन गरेका हुन् ।
वृत्ति मार्गनिर्देशन सेवा स्विस सरकारद्वारा युवाहरूलाई सक्षम बनाउन अपनाइएको प्रभावकारी विधि हो । जसको नयाँ अभ्यासले शिक्षा र स्वास्थ्यमा समेत आशाको स्रोत बन्ने विश्वास नगरपालिकाले लिएको छ । नगरप्रमुख कार्कीले स्थानीय स्तरमा धेरै कामहरू भइरहँदा शिक्षा र स्वास्थ्यलाई पनि व्यवस्थित रूपमा अगाडि बढाउन नगरपालिकाले प्रयास गरेको बताएका छन् । यस सेवा इकाइबाट मनोविज्ञानमा दक्ष परामर्शदाता तथा वृत्ति मार्गनिर्देशन सहजकर्ताहरूले युवाहरूलाई आवश्यक परामर्श प्रदान गर्नेछन् । साथै, डिजिटल प्लेटफर्ममार्फत योग्यता परीक्षण गरी उनीहरूको रुची, क्षमता तथा श्रम बजारको मागका आधारमा सम्भावित वृत्ति मार्ग पहिचान गरिनेछ । युवाहरूलाई सही दिशा दिन, उपयुक्त रोजगारीको अवसर पहिचान गर्न तथा उनीहरूको व्यावसायिक र व्यक्तिगत विकासमा सहयोग पु¥याउन यो सेवा महत्वपूर्ण हुने विश्वास उनले व्यक्त गरेका छन् ।
मार्गनिर्देशन सेवा इकाइमार्फत नगरभित्रका कक्षा ८ देखि १२ सम्मका विद्यार्थीहरू तथा अन्य युवाहरूलाई व्यक्तिगत तथा सामूहिक परामर्श प्रदान गरिनेछ । यसलाई प्रभावकारी बनाउन शिक्षकहरूको विशेष भूमिका हुने भएका कारण शिक्षकहरूलाई आवश्यक तालिम पनि प्रदान गरिसकेको छ । नगरपालिकाले शिक्षालाई गुणस्तरीय बनाउन तथा युवाहरूलाई रोजगारीमुखी बनाउन यस्तो कार्यक्रमलाई निरन्तरता दिँदै आएको छ ।