एकाएक रणभूमि बन्यो नवलपरासी, गोदाम र प्रहरीको गाडी जल्यो

पश्चिम नवलपरासीमा एक प्रेम जोडीको भागी विवाहले दुई परिवारबीच विवाद बढ्दा झडपको अवस्था सिर्जना भएको छ । करिब तीन महिनाअघि नवलपरासी पश्चिमको पाल्हिनन्दन गाउँपालिका–३ स्थित बेलासपुरमा एक प्रेम जोडीले भागेर विवाह गरेका थिए । सोही विषयलाई लिएर आज बिहान ९ बजे केटी र केटा पक्षबीच झडप भएको हो । झडप नियन्त्रण गर्न पुगेको प्रहरीको भ्यानसमेत जलाइएको छ भने प्रहरी र स्थानीय गरी २० जनाभन्दा बढी घाइते भएका छन् ।

चलचित्रको दृष्य जस्तो देखिने गरी पश्चिम नवलपरासीमा मंगलबार एउटा घटना घट्यो ।करिब तीन महिनाअघि नवलपरासी पश्चिमको पाल्हिनन्दन गाउँपालिका–३ स्थित बेलासपुरमा एक प्रेम जोडीले भागेर विवाह गरेका थिए । सोही विषयलाई लिएर केटी पक्षले केटाका बुवालाई गत माघमा कुटपिट गरेको थियो । यसपछि गत सोमबार राति फेरि केटी पक्षका आफन्तले केटाका भाइलाई बाटोमै रोकेर कुटपिट गरे । कुटपिटबाट घाइते भएका युवकको उपचार भइरहेको छ ।। त्यस पश्चात दुई परिवारबीच बढ्दो द्वन्द्वले झडपकै अवस्था निम्त्याएको छ ।

प्रेम विवाहको विषयलाई लिएर उत्पन्न विवादमा मंगलबार झडप हुँदा प्रहरीसहित २० जनाभन्दा बढी घाइते भएका छन् । घाइतेमध्ये एक जनाको अवस्था गम्भीर छ । झडपका क्रममा केटापक्षको समूहले केटीपक्षका आफन्तको कवाड गोदाममा समेत आगजनी गरी ध्वस्त बनाएका छन् । आगजनीबाट सो कवाड गोदाम ध्वस्त भएको छ । यस्तै केटीपक्षका आफन्तको घरमासमेत क्षति पुगेको छ ।केटापक्षबाट आएका गाउँलेको समूहले मोहरमको बेलासपुरमा रहेको कवाड गोदाममा आगजनी गरेका हुन् ।

सोमबार साँझ बाटो हिडिँरहेका केटाको भाइलाई केटी पक्षले मरणसन्न हुने गरी कुटे पछि सिंगो गाउँलेहरू नै दुई पक्षमा विभाजित भइ झडपमा उत्रिएका थिए । लाठ्ठी, धारिलो हतियार, ढुंगा मुढासहित दुई पक्ष झडपमा उत्रिदा सिंगो गाउँनै रणमैदान बनेको थियो । दुई पक्षबीचको झडप नियन्त्रणका लागि प्रहरीले बल प्रयोग गर्नु पर्ने अवस्था बनेको हो ।

यसक्रममा प्रहरी र स्थानीयबीच नै झडप हुँदा स्थिति असामान्य बनेको थियो । दुई पक्षको झडप नियन्त्रण गर्न पुगेको प्रहरी टोली नै भागभाग गर्नु पर्ने अवस्था बन्यो । उच्छृंखल बनेको समूहले प्रहरीको बा १ झ७४४८ नम्बरको भ्यानमा आगजनी गर्दा पूर्ण रुपले नष्ट भएको छ । स्थिति नियन्त्रणमा लिने क्रममा प्रहरीले अश्रुग्यास र केही राउण्ड हवाई फायरसमेत गरेको थियो । प्रहरीले भिड नियन्त्रणमा लिन नसके पछि शसस्त्र प्रहरी बल परिचालन गरिएको थियो । नेपाल प्रहरी र शसस्त्र प्रहरी परिचालन पछि भने झडप नियन्त्रणमा आइसकेको छ । प्रहरीको भ्यान जलाउने कार्यमा संलग्न भएको आरोपमा चार महिलासहित पाँच जनालाई पक्राउ गरिएको र अन्यको खोजी कार्य भइरहेको प्रहरीले जनाएको छ । अहिले घटनास्थलको अवस्था सामान्य रहेको प्रहरीले जनाएको छ ।

घाइतेहरुको नजिकैको अस्पतालमा उपचार भइरहेको छ । घाइतेमध्ये केटापक्षका विजय धवलको अवस्था चिन्ताजनक छ । केटापक्षकै ४५ वर्षीय बैजनाथ प्रसाद लोनियाको अवस्था पनि गम्भीर रहेको जिल्ला प्रहरी कार्यालयका सूचना अधिकारी प्रहरी निरीक्षक नारायण थापाले जानकारी दिए । दुई जनाको भैरहवा सिटी अस्पतालमा उपचार भइरहेको छ । यो विषयलाई लिएर मंगलबारको संसद बैठकमा पनि आवाज उठेको छ । स्वतन्त्र सांसद अमरेश कुमार सिंहले घटनाको जानकारी गराउँदै दोषीमाथिकारबाहीको माग गरेका छन् ।

प्रमे विवाहको विषयलाई लिएर दुई परिवार हुँदै सिंगो गाउँ नै हिंसात्मक झडपमा उत्रिँदा नवलपरासीजिल्ला नै तरंगित बनेको छ । दुई परिवारबीच बढेको द्वन्द्वमा स्थानीय वडा कार्यालयको पहलमा जिल्ला प्रहरी कार्यालयमा मिलापत्रसमेत भएको घटनामा सरोकारवाला निकाय चनाखो नहुँदा हिंसात्मक अवस्था सिर्जना भएको देखिन्छ । साथै स्थानीय सरकार र प्रहरीबीच समयमै समन्वय हुन नसक्दा घटनाले थप उग्ररुप लिएको देखिन्छ ।