खो–खो विश्वकपमा नेपाली महिला टोली उपाधि चुम्नबाट चुक्यो

काठमाडौं—भारतमा भएको पहिलो खो खो विश्वकपको उपाधि जित्नबाट नेपाली महिला टोली चुकेको छ । नयाँ दिल्लीस्थित इन्दिरा गान्धी इन्डोर स्टेडियममा आज साँझ भएको फाइनल खेलमा नेपाल भारतसँग पराजित हुँदै इतिहास रच्नबाट चुकेको हो । पहिलो खो खो विश्वकपको उपविजेतामा सीमित नेपाल भारतसँग ७८–४० अंकले पराजित भएको हो । नेपाललाई हराउँदै घरेलु महिला टोली पहिलो संस्करणको खो खो विश्व विजेता बन्न सफल भएको छ । प्रतियोगिता अन्तर्गत आजै पुरुष तर्फको उपाधि भिडन्त पनि हुँदैछ । पुरुषतर्फ पनि नेपाली टोलीले भारतसँग नै उपाधिका लागि प्रतिस्पर्धा गर्दैछ । पुरुषतर्फ २० र महिलातर्फ १९ टिम सहभागी प्रतिस्पर्धामा नेपाल र आयोजक भारतका दुवै टिम फाइनलमा पुगेका हुन् ।