काठमाडौं । युएईमा जारी आइसीसी अण्डर–१९ महिला टि–२० विश्वकप एसिया छनोटअन्तर्गत नेपालले आज आफ्नो चौथो खेल थाइल्याण्डसँग खेल्ने भएको छ ।
नेपाल र थाइल्याण्डबीचको खेल आज दिउँसो सवा ३ बजे सुरु हुने छ । गत बुधबारदेखि सुरु भएको प्रतियोगितामा नेपालले पहिलो खेल थाइल्याण्डसँग खेलेको थियो । उक्त खेलमा नेपालले थाइल्याण्डलाई ६७ रनको फराकिलो अन्तरले पराजित गरेको थियो । नेपालले दोस्रो खेल बिहीबार कुवेतसँग खेलेको थियो ।
उक्त खेलमा नेपालले कुवेतलाई १०८ रनले हराएको थियो । तेस्रो खेलमा भने नेपाल युएईसँग १३ रनले पराजित भएको थियो । प्रतियोगितामा आयोजक युएईसहित नेपाल, कुवेत र थाइल्याण्ड सहभागी छन् ।
प्रत्येक टोलीले एकअर्कासँग दुई दुई खेल खेल्ने छन् । सहभागी चार टोलीमध्ये शीर्ष स्थानमा रहने टोली आइसीसी अण्डर–१९ महिला टि–२० विश्वकपका लागि छनोट हुनेछ । अण्डर–१९ विश्वकप क्रिकेट प्रतियोगिता अर्को वर्ष जनवरीमा मलेसियामा आयोजना हुँदैछ ।
प्रतिक्रिया