काठमाडौँ— राष्ट्रिय स्वतन्त्र पार्टी (रास्वपा)का सभापति रवि लामिछानेले सहकारीको रकम आफूले दुरुपयोग गरेको प्रमाण ल्याए राजनीति छाड्ने बताएका छन् ।
आज चितवनको डडुवामा आयोजित एक कार्यक्रममा उनले आफूले ऋण लिएको प्रमाण छ भनेर संसद्मा आवाज उठाउने नेताले १०६ दिन बित्दा समेत त्यो दिन नसकेको उल्लेख गरे । अझै पनि आफूविरुद्ध कुनै प्रमाण देखिए राजनीति छाड्ने उनको भनाइ थियो ।
उनले भ्रष्टाचारको अनुसन्धान र अभियोजनमा हदम्याद स्वीकार्य नहुने पनि बताए । भ्रष्टाचारीलाई जोगाउन हदम्यादसहितको विधेयकलाई बहुमतको बलमा अघि बढाउन खोजिए परिणाम नराम्रो हुने उनले चेतावनी दिए । उनले भ्रष्टाचारका विभिन्न फाइललाई आफूले हिम्मतका साथ खोलेकै कारण हदम्यादको विषय आएको जिकिर गरे ।
दुई ठूला दल नेपाली कांग्रेस र नेकपा (एमाले)को सरकारले जनताका पक्षमा काम गरेर गठबन्धनको औचित्य पुष्टि गर्नुपर्नेमा उनले जोड दिए ।
प्रतिक्रिया