प्रधानमन्त्रीमा नियुक्त भएसँगै केपी शर्मा ओलीको मात्रै नभई मन्त्रीहरुको पनि रफ्तार र आत्मविश्वास बढेको छ । मन्त्रिमण्डलाई एकैपटक पूर्णता दिँदै अघि बढेका ओली र उनी नेतृत्वको सरकारलाई घेराबन्दी पनि छैन । कसैलाई रिजानु नपर्ने र सुशासन लागि पूर्ण काम गर्ने ठाउँमा पुगेको ओली नेतृत्वको सरकार कति सफल होला त ?
एकै पटक२२ सदस्यीय मन्त्रिमण्डल विस्तार गर्दै अघि बढेको केपी शर्मा ओली नेतृत्वको सरकार रफ्तारमा छ । असार ३१ गते राष्ट्रपतिबाट प्रधानमन्त्री ओली र २१ मन्त्रीको शपथ लिएरमन्त्रिपरिषदलाई एकै पटक पूर्णता दिँदै ऐतिहासिक कदम चालेका ओलीले सोही दिन मन्त्रिपरिषद्को पहिलो बैठक राखे । पहिलो मन्त्रिपरिषद् बैठकबाटै प्रधानमन्त्री ओलीले त्रिवि क्रिकेट रंगशालाको स्तरोन्नतिको कार्य सक्ने समय नै तोके भने टाइमकार्ड लिएर काम गर्न मन्त्रीहरुलाई निर्देशन दिए ।
अहिले प्रधानमन्त्री ओलीले सत्ता सञ्चालनका लागि चाहिने नियुक्तिसमेत धमाधम गरिरहेका छन् । जसका लागि उनले सत्तारुढ दलको प्रमुख सचेतकमा महेश बर्तौतालाई नियुक्त गर्नेदेखि महान्याधिवक्तामा रमेश बडाललाई नियुक्ति गर्ने काम गरे । पूर्ण आत्मविश्वासका साथ अघि बढेका ओली नेतृत्वका मन्त्रीहरुको पनि रफ्तार कम छैन । जहाँ गृहमन्त्री रमेश लेखकले पहिलो निर्णय नै सिमलताल पहिरोमा परि हराएकाको खोजी गर्न कार्यदल गठन गर्दै विपद्विरुद्ध लड्ने कदम चाले ।
प्रहरी हेडक्वार्टरमै पुगेर उनले निष्पक्षता, पारदर्शिता र व्यवसायिकतामा सम्झौता नगर्न निर्देशनसमेत दिइसकेका छन् । यस्तै शिक्षामन्त्री विद्या भट्टराईले पनि एक महिनाभित्र परिणाम दिने गरी काम गर्ने उद्घोष गरिसकेकी छन् । तीन वर्षअघि असार २८ मा सत्ताच्युत भएर पुनः ३ वर्षपछि असार २८ मै ठूलो राजनीतिक संर्घषपछि सत्तारोहण गरेका ओलीलाई यो चौथौ कार्यकालमा सफल हुने अवसर मिलेको छ । पहिला जस्तो घेराबन्दी नहुँदा आत्मविश्वास बढाएका ओली यो कार्यकालमा सुशासनको सान बढाउने हुटहुटीमा छन् ।
सदनको सबैभन्दा ठूलो दलको समर्थन र प्र्रतिपक्ष कमजोर हुँदा हौसिएका ओलीको आत्मविश्वास बढ्नु स्वभाविकै हो । तर सत्तापक्षविरुद्ध घेराबन्दी बढाउन प्रतिपक्ष एक ढिक्का मात्रै भएको छैन उनीहरुले विभिन्न रणनीति बुन्न थालिसकेका छन् । माओवादी अध्यक्ष पुष्पकमल दाहाल प्रचण्ड नेतृत्वको सरकारमा गुमनाम भएको समाजवादी मोर्चा अहिले पुनः ब्युँतिएको छ ।
जहाँ नेकपा माओवादी केन्द्र, नेकपा एकीकृत समाजवादी पार्टीलगायतका ४ दल सरकारविरुद्ध थप सशक्त ढङ्गले अघि बढ्ने तयारीमा छन् । यतिमात्रै होइन प्रधानमन्त्रीमा ओलीको नियुक्ति गैरसंवैधानिक भन्दै सर्वोच्चमा रिटसमेत परिसकेको छ । जसको सामना गर्दै अघि बढनुपर्ने चुनौतीमा प्रधानमन्त्री ओली छन् । सत्तामा आफूलाई धोका दिएपछि रन्थनिएको माओवादी ओलीसँग बद्ला लिने रणनीतिमा छ ।
त्यसोत, सदनको चौथौ दल राष्ट्रिय स्वतन्त्र पार्टी (रास्वपा) पनि सरकारविरुद्ध सशक्त आवाज उठाउँदै बलियो प्रतिपक्षी बन्ने रणनीतिमा छ । कमजोरै भएपनि प्रतिपक्षको घेराबन्दी तोड्दै अघि बढ्नुपर्ने चुनौतीमा रहेको सरकारलाईस्वार्थका लागि दलहरुले सत्ता साटेको आरोप चिर्दै सुशासनको परिणाम दिनुपर्ने दबाब छ । यसअघिका तत्कालीन गृहमन्त्री रवि लामिछाने, पूर्वगृहमन्त्री नारायणकाजी श्रेष्ठलाई खरो प्रश्न गर्ने रमेश लेखक अहिले जवाफ दिने ठाउँ गृहमै आएका छन् । अब उनी कति सफल हुन्छन् । त्यसका लागि केही समय कुर्नै पर्ने हुन्छ । यद्यपि, नयाँ सरकारले उपलब्धिमुलुक केही काम गर्न नसक्ने र देशमा झनै अस्थिरता छाउने विश्लेषकको टिप्पणी छ ।
ठूला दलहरुको सहमतिमा बनेको सत्ता समीकरण वर्ष दिनभन्दा माथि टिक्ने अनुमान छ । स्थायित्वसँगै यो सरकारले परिणाम दिने विश्वास गरिए पनि सत्ता स्वार्थका लागिजुन कुनैबेला जो कोहीलाई धोका दिने परिपाटीका कारण यो समीकरण पनि कति टिक्छ? यसै भन्न सक्ने अवस्था छैन ।
तर सरकारलाई टिकाउने रणनीति अनुरुप अघि बढेका ओली राजनीतिक झन्झटबाट मुक्त हुन यही साउन ६ गते विश्वासको मत लिने तयारीमा छन् । तर, यो सरकार बनाउनकै लागि कांग्रेस–एमालेबीच भएको सात बुँदे सम्झौता अझैसम्म सार्वजनिक नहुनुले भने शंका उब्जाएको छ । बाहिर आएकाभन्दा अरु नै सहमति भएको हुन सक्नेभन्दै सार्वजनिक गर्न आलटाल गरिएको विश्लेषणसमेत भइरहेको छ । जसले गर्दा यो सरकार पनि विगतका सरकारभन्दा फरक नहुने र स्वार्थ केन्द्रित राजनीतिमै रुमलिने टिप्पणी हुने गरेको छ ।
पटक–पटकको अस्थिरताबाट आजित भएका नेपाली नागरिकले सत्ता सञ्चालनमा सुधार र सुशासनमा रफ्तार चाहेका छन् । साथै आफ्नो दैनिकीमासमेत परिवर्तन चाहन्छन् । राजनीतिक रुपमा सत्ता यात्रा गर्न सफल भएका ओली जनताको मन जित्न कति सफल हुन्छन् ?त्यो त आगामी दिनले नै देखाउँला । तर ओलीको यो चौथौ कार्यकालमा पनि जनताले महसुस हुने गरी काम गर्न नसके ८४ मा पहिलो शक्ति बन्ने रणनीतिमा रहेको एमालेलाई जनताले नै मूल्याङ्कन गर्दै सोहीअनुसार नतिजा दिने नै छन् ।।
प्रतिक्रिया