बयान बाझिने दरबार हत्याकाण्ड, प्रचण्डदेखि पूवराजा माथिनै प्रश्न, विरेन्द्रका अंग रक्षकको बयान (भिडियोसहित)

काठमाडौँ— २०५८ जेठ १९ गते साँझ नारायणहिटी राजदरवारभित्र तत्कालीन राजा वीरेन्द्र विरविक्रम शाहको वंश विनास भएको आज २३ वर्ष पुगेको छ । इतिहासकै रहस्यमय र बीभत्स घटनाका रुपमा रहेको हत्याकाण्डको सत्यतत्थ्य बाहिर ल्याउन राजनीतिक नेतृत्वले चासो नदेखाउदाँ अझै यो हत्याकाण्ड रहस्यकै गर्भमा छ ।

२३ वर्ष अघि आजकै दिन तत्कालिन राजा वीरेन्द्रविरविक्रम शाहको वंश नै नाश हुने गरि नारायणहिटी राजदरबारभित्र बिभत्स हत्या भएको थियो । नियमित पारिवारिक जमघटको मौका पारी राजा वीरेन्द्र, रानी ऐश्वर्य, युवराज दीपेन्द्र र निराजन, राजकुमारी श्रुति, राजकुमार धिरेन्द्र, राजकुमारी जयन्ती, राजकुमारी शान्ती, राजकुमारी शारदा, कुमार खड्कासहित राजपरिवारका अन्य सदस्यहरूले सो हत्याकाण्डमा ज्यान गुमाएका थिए । तर उच्च सुरक्षा घेराभित्र रहेको दरबार हत्याकाण्डको यतिका बर्ष बित्दा समेत जनताले चित्तबुझ्दो कारणसहितको जवाफ पाएका छैनन् ।

दरबार हत्याकाण्डको दोषी पत्ता लगाउँछु भनेकाले नै अहिले सरकारको नेतृत्व गरिरहेका छन् । तर, हत्याकाण्डको रहस्य रहस्यमै सीमित छ । प्रधानमन्त्री पुष्पकमल दाहाल प्रचण्ड तीन पटक देशको कार्यकारी पदमा त पुगिसके तर नतीजा भने दिन सकेका छैनन् । बरु, नेपाली राजनीतिमा पूर्वराजा ज्ञानेन्द्र शाहको सक्रियताबाट भयभीत हुँदाका बखत भने हत्या काण्डको फाइल खोल्नु पर्ने धम्कीयुत्त चेतावनी दिदै आएकाछन् । दरबार हत्याकाण्डको सबै रहस्य थाहा पाएको झै गरि हत्यारालाई सवक सिकाउने शैलीमा उनको अभिव्यक्ति आईरहन्छ ।

दरबार हत्याकाण्डपछि तत्कालीन प्रधानन्यायाधीशको संयोजकत्वमा एक उच्चस्तरीय छानबिन समिति गठन गरिएको भएपनि धेरैले समितिले स्वतन्त्र अनुसन्धान गर्न नसकेको तर्क गरेकाछन् । प्रतिवेदन सार्वजनिक गर्ने तत्कालिन सभामुख तारनाथ रानाभाटले भने कार्यदेशबाट गठित समितिले सुरक्षाका निकाय लगायत व्यक्तिहरुले दिएको बयानका आधारमा युवराज दिपेन्द्र शाह नै घटनाको मूख्य जिम्मेवार रहेको ठहर गरेको छ । तर नागरिकले प्रतिवेदनको विश्वसनियतामाथिनै प्रश्न उठाएकाछन् । अर्थात दिपेन्द्रबाट यो तहको अपराध भएको नागरिकले स्विकारेका छैनन् ।
हत्यामा बाह्य शक्ति लगायत अन्यको पनि संलग्नता रहेको आशङ्काबीच युवराज दीपेन्द्रले नै सो हत्याकाण्ड मच्चाएको प्रतिवेदनमा उल्लेख छ ।
पूर्वप्रधानमन्त्री समेत रहेका नेकपा एमालेका अध्यक्ष केपी शर्मा ओलीले नै पनि राजनीतिक आधारमा बनेको आयोगले दिएको कार्यादेश अनुसार निकालिएको प्रतिवेदनबाट चित्त बुझाउन सकेका छैनन् ।

हत्याकाण्डपछि प्रमाण मेटाउने गरी गरिएका कार्यहरूले नै यो षडयन्त्रपूर्वक घटना भएको प्रष्ट हुने ओलीको बुझाई छ । पूर्वप्रधानमन्त्रीसँगै राष्ट्रिय राजनीतिको बलियो दलको अध्यक्षले नै प्रतिवेदन झुटो भएको बताईरहँदा यस घटनाको दोहोर्याएर कुनै स्वतन्त्र अनुसन्धान गर्ने तर्फ कसैको ध्यान जान सकेको छैन । लामो समय बितिसकेको र प्रमाण पनि मेटाउने काम भई सकेको हुँदा प्रमाणका दृष्टिले छानविन सम्भव नहोला । तर, तत्कालिन सत्तामा रहेका र दरबारियाको नजिक रहेर काम गरेकाहरूले कुनै दिन रहस्यलाई बाहिर ल्याउन सक्ने सम्भावनालाई भने नकार्न सकिदैँन । २६ वर्ष राजपरिवारको अङ्ग रक्षक भएर दरबारियासँग उठ बस गरेकाहरू घटना घट्नु नै दुखद् भएको भन्दै
व्यक्ति भन्दा पनि परिस्थिति दोषी भएको जिकीर गर्दै आएकाछन् ।

दरबार हत्याकाण्डबारे अनेक आशङ्का र अनुमान गरिए, तर अझै पनि यो रहस्यमय घटनाबाट पर्दा हट्न सकेको छैन । हत्या दीपेन्द्रले नै गरेको भएपनि किन गरे भत्रे विषय नखुलाउँदा हत्याकाण्डको छानविनका लागि गठित समितिमाथि नै प्रश्न उठिरहेको छ । सरकारमा रहेकाले छानविन गर्न चाहे सत्यतथ्यबाहिर आउने कुरामा शंसय छैन । सबै तथ्यप्रमाणहरू नष्ट नै भईसकेको भए पनि आफ्नो राजनीतिक स्वार्थकै लागि दरबार हत्या काण्डबारे छानविन गर्नु पर्ने ध्वास दिनेहरूबाट घटनाको रहस्य सार्वजनिक हुनेमा झिनो आश भने राख्न सकिएला । तर, झण्डै साढे दुई दशक बितिसक्दा समेत हत्याकाण्डलाई रहस्यकै गर्भमा थाति राख्दा अझै यो कति दशकसम्म लम्बिने हो यसै भन्न सक्ने अवस्था छैन ।