महिला टी–ट्वान्टी सिरिजः नेपाल मलेसियासँग ६ विकेटले पराजित

काठमाडौं । चार राष्ट्र सम्मिलित ट्वान्टी–२० अन्तर्राष्ट्रिय प्रतियोगितामा मलेसियाले नेपाललाई ६ विकेटले पराजित गरेको छ ।मलेसियाको बायोमास स्पोर्टस् एण्ड इभेन्ट कम्प्लेक्समा जितका लागि पाएको ८५ रनको लक्ष्य मलेसियाले १६.२ ओभरमा ४ विकेट गुमाएर भेट्टाएको हो । मलेसियालाई जिताउन ओपनर ऐन्ना हमिजा हसिमले नट आउट ३७ रन बनाइन् । नेपालका लागि भने कप्तान रुबिना क्षेत्रीले सर्वाधिक २३ रन बनाइन् ।

मलेसियासँगको फराकिलो हारको बाबजुत पनि नेपाल रनरेटका आधारमा शिर्ष स्थानमा रहँदै फाइनल प्रवेश गरेको हो । मलेसिया भने जितका बाबजुत पनि बाहिरिएको छ । नेपालले अब भोली दोस्रो स्थानमा रहेको हङकङसँग फाइनल खेल्नेछ ।यसअघि नेपालले पहिलो दुई खेलमा हङकङलाई ६ विकेटले र कुवेतलाई ३४ रनले पराजित गरेको थियो ।