टर्की र सिरियामा भूकम्पबाट २१ हजारभन्दा बढीको मृत्यु

टर्की र सिरियामा सोमबारको विनाशकारी भूकम्पका कारण मृत्यु हुनेको संख्या बढ्दै गएको छ । जानकारी अनुसार हालसम्म २१ हजारभन्दा बढीको मृत्यु भइसकेको छ ।

टर्कीमा करिब १७ हजारभन्दा बढी मानिस मारिएका छन् । योसँगै सिरियामा ३ हजारभन्दा बढीको मृत्यु भएको छ । यस प्रकोपमा ७० हजार ३४७ जना घाइते भएका छन्।

डब्ल्यूएचओका महानिर्देशक टेड्रोस अधानोम गेब्रेयसस सिरिया प्रस्थान गरेका छन् । अन्टाक्याको पूर्व, दियारबाकिरमा, उद्धारकर्ताहरूले बिहान भत्किएको भवनबाट करिब ७२ घण्टापछि एक घाइते महिलालाई जिउँदै निकालेका छन्। तर महिलासँगै आएका तीन जना भने भग्नावशेषमा मृत फेला परेका थिए ।

भारतीय विदेश मन्त्री एस जयशंकरले बिहीबार अपरेशन डोस्ट अन्तर्गत भूकम्प पीडित उद्धार कार्यका लागि उद्धारकर्मी, अत्यावश्यक सामग्री र चिकित्सा उपकरण लिएर भारतबाट छैटौं विमान टर्की पुगेको बताए। यसमा थप राहत कार्यकर्ता, कुकुर टोली र अत्यावश्यक औषधि भूकम्प प्रभावित मुलुकमा पठाइएको छ ।

यसको आधिकारिक ट्विटर ह्यान्डलमा, विदेश मन्त्रालयले टर्कीमा चलिरहेको मोबाइल अस्पतालको तस्बिरहरू पनि पोस्ट गरे । जहाँ चिकित्सा विशेषज्ञहरूले आपतकालीन अवस्थामा मानिसहरूको उपचार गरिरहेका छन्। अर्कोतर्फ, भूकम्प प्रभावित टर्कीमा राहत र उद्धार कार्यमा संलग्न भारतको एनडीआरएफ टोलीले गाजियन्टेपमा भग्नावशेषमुनि ६ वर्षीया बालिकालाई जीवितै उद्धार गरेको छ । राष्ट्रपति तैयप एर्दोगानले सरकारको ढिलो उद्धार र राहत कार्यको लागि आलोचनाको सामना गर्नु परेको छ ।