झगडामा चल्यो गोली

काठमाडौँ— नेपालगन्जको त्रिभुवन चोकस्थित युवाहरूको झगडामा गोली प्रहार भएको छ । युवाहरूको सामान्य झगडामा गोली हान्ने धम्की दिँदै फायर खोल्नेलाई प्रहरीले खोजी कार्य अगाडि बढाएको जनाएको छ ।आइतबार साँझ नेपालगन्जमा गोली चलेको हो ।

नेपालगन्ज वडा नम्बर ८ त्रिभुवन चोक नजिकै दुई आपराधिक गिरोहबीच विवाद हुँदा गोली चलेको हो । प्रहरीका अनुसार दुई समूहबीच विवाद हुँदा एक पक्षले अर्को पक्षलाई घेरेपछि घेरामा परेको पक्षले हवाइ फायर गरेर भागेको पाइएको बाँके प्रहरीले जनाएको छ । बाँके प्रहरीले घटनाको पुष्टि गरेको छ । बाँके प्रहरीका प्रवक्ता डीएसपी रामप्रसाद घर्तीमगरले उक्त घटनामा दुईवटा आपराधिक गिरोहको संलग्नता रहेको प्रारम्भिक सूचना प्राप्त भएको र केही व्यक्तिहरूको नाम पनि प्रहरीले प्राप्त गरेको जानकारी दिए ।

गोली प्रहार गर्ने नेपालगन्जकै स्थानीयवासी रहेको र उनीहरूको खोजीकार्य तीव्र पारिएको उनले जानकारी दिए । बाँके प्रहरी प्रमुख, प्रहरी उपरीक्षक श्यामकृष्ण अधिकारीले कानुनभन्दा माथि कोही नरहेकाले सार्वजनिक ठाउँमा फायर गर्ने जो कसैलाई पनि कारबाहीको दायरामा ल्याउन प्रहरी प्रतिबद्ध रहेको बताए।