बाउन्सरलाई हतियार प्रहार गरी फरार दुईजना पक्राउ

काठमाडौँ— काठमाडौँ दरबारमार्गस्थित क्लब प्लाटिनमा बाउन्सरका रूपमा कार्यरत निकेत राई र तेन्जुङ शेर्पालाई धारिलो हतियार प्रहार गरी फरार रहेको आरोपमा दुईजना पक्राउ परेका छन् । काठमाडौँ महानगरपालिका–२६, गल्कोपाखास्थित हनुमानचोकनजिक धारिलो हतियार प्रहार गरी फरार रहेका उनीहरूलाई काठमाडौँ उपत्यका अपराध अनुसन्धान कार्यालयको टोलीले पक्राउ गरेको हो ।

पक्राउ पर्नेहरूमा दोलखाको शैलुङ गाउँपालिका–२ घर भई काठमाडौंको बौद्ध बस्दै आएका २९ वर्षीय विनोद तामाङ र सोही ठाउँ बस्दै आएका ३३ वर्षीय जीवन तामाङ रहेका छन् ।मोटरसाइकलमा आएका सातरआठ अपरिचित व्यक्तिले राई र शेर्पालाई खुकुरी प्रहार गरी घाइते बनाई फरार भएका थिए ।

घटनामा संलग्नमध्ये विनोद र जीवनलाई बौद्धबाट पक्राउ गरिएको हो । उनीहरूलाई ज्यान मार्ने उद्योगसम्बन्धी कसुरमा आवश्यक कारबाहीका लागि प्रहरी वृत्त लैनचौर पठाइएको प्रहरीले जनाएको छ ।