सवारी दुर्घटनामा परी तीन जनाको मृत्यु

काठमाडौँ— नवलपरासी पश्चिम सुनवल नगरपालिका ३ राधाकृष्ण टोलस्थित सडकमा बा २ च ७३३२ नम्बरको कारको ठक्करबाट सोही ठाउँ बस्ने घनश्याम हरिजनको ४ वर्षीय छोरा प्रविन हरिजनको आइतबार दिउँसो मृत्यु भएको छ । कारको ठक्करबाट गम्भीर घाइते भएका उनको लुम्बिनी प्रादेशिक अस्पताल बुटवलमा उपचारको क्रममा मृत्यु भएको हो । कार चालकलाई प्रहरीले नियन्त्रणमा लिएको छ ।

दाङ, घोराही उपमहानगरपालिका १० चारबगियामा बीएए २५८० नम्बरको कारको ठक्करबाट पैदलयात्री सोही ठाउँ बस्ने ७५ वर्षीया कुवारी उपाध्यायको आइतबार साँझ मृत्यु भएको छ । ठक्करबाट गम्भीर घाइते भएका उनको राप्ती स्वास्थ्य बिज्ञान प्रतिष्ठान घोराहीमा उपचारको क्रममा मृत्यु भएको हो । हाल फरार कार चालकको प्रहरीले खोजी गरिरहेको छ ।

महोत्तरी, गौशला नगरपालिका १ मिलन चौकस्थित सडकमा बा ८७ प ९६७ नम्बरको मोटरसाइकलको ठक्करबाट पैदलयात्री सोही नगरपालिका १ रामनगर बस्ने ६५ वर्षीय चेत प्रसाद प्याकुरेलको आइतबार राति मृत्यु भएको छ । ठक्करबाट गम्भीर घाइते भएका उनको शुभ स्वस्थिक अस्पताल बर्दिबास हुँदै जानकी मेडिकल अस्पताल रमदैया धनुषामा थप उपचारको क्रममा मृत्यु भएको हो ।

साथै दुर्घटनामा घाइते भएका मोटरसाइकलमा सवार अन्य १ जनाको शुभ स्वस्थिक अस्पताल बर्दिबासमा उपचार भइरहेको छ । फरार रहेका मोटरसाइकल चालकको प्रहरीले खोजी गरिरहेको छ । यस सम्बन्धमा प्रहरीले आवश्यक अनुसन्धान गरिरहेको छ ।