चीनसँगको सीमा नजिक अमेरिका र भारतले संयुक्त सैन्य अभ्यास गर्ने

काठमाडौँ — दुई देशले नियमित रूपमा गर्दै आएको संयुक्त ‘युद्ध अभ्यास’ को १८औँ संस्करण केही दिनमा सुरु हुने भारतीय तथा अमेरिकी सञ्चारमाध्यमले जनाएका छन् । यो वर्षको सैन्य अभ्यास सीमा विवाद रहेको चीनसँगको सीमा क्षेत्रबाट एक सय किलोमिटर भन्दा कमको दूरीमा हुने तयारी छ । उत्तराखण्डको औलीमा १० हजार फिटको उचाइमा हाइअल्टिच्युड युद्ध अभ्यास हुने भएको हो । भारतीय सेनाका शीर्ष अधिकारीले त्यसको पुष्टि गरेको अमेरिकी सञ्चारमाध्यम सिएनएनले जनाएको छ ।

दुबै देशका अधिकारीले नियमित अभ्यास भनेका छन् । तर, चीन भने सशंकित बनेको छ । सैन्य अभ्यासका लागि तय भएको औली चीनसँगको सीमा क्षेत्रको लाइन अफ एक्चुअल कन्ट्रोलबाट ९५ किलोमिटरको दूरीमा छ । सन् २०२० को जुनमा सीमा क्षेत्रमा भएको भीडन्तमा कम्तीमा २० भारतीय सैनिक मारिएका थिए । उक्त भीडन्तमा चार चिनियाँ सैनिकको पनि मृत्यु भएको थियो ।