Breaking

ईपीएस परीक्षा आजदेखि सुरु हुँदै


काठमाडौँ — कोरियन भाषा परीक्षा आजदेखि सुरु हुने भएको छ ।

कृषि तथा पशुपालन क्षेत्रको कोरियन भाषा परीक्षा आजदेखि सञ्चालन हुन लागेको हो । वैदेशिक रोजगार विभागअन्तर्गतको रोजगार अनुमति प्रणाली (ईपीएस) शाखाले कोरिया जानका लागि आवेदन दिएकामध्ये कृषि तथा पशुपालन क्षेत्रको भाषा परीक्षा आजदेखि असार ३ सम्म सञ्चालन हुन लागेको हो ।

इपिएस शाखाका अनुसार परीक्षा ललितपुरको भैँसेपाटीस्थित सिबिटी भवनमा ३ सिफ्टमा सञ्चालन हुने छ । जस अनुसार पहिलो सिफ्ट बिहान १० बजेदेखि सुरु हुनेछ भने दोस्रो सिफ्ट बिहान साढे ११ बजे र तेस्रो सिफ्ट दिउँसो २ बजे सुरु हुने छ ।

परीक्षा सुरु हुनु भन्दा एक घण्टा अगावै परीक्षार्थीहरुलाई परीक्षा हल भित्र अभिमुखीकरण दिइने छ । रोजगारीका लागि कोरिया जान ४३ हजार भन्दा बढीले आवेदन दिएका छन् ।

भाषा परीक्षा पास गरेकामध्ये ९ हजार ५ सय १३ जनालाई यसै वर्ष कोरिया पठाउने तयारी छ । यसअघि वैशाख २६ देखि सञ्चालन गर्ने भनिए पनि स्थानीय तहको निर्वाचनका कारण स्थगन गरिएको थियो ।