मेयर घिमिरेविरुद्ध आचारसंहिता उल्लंघनको उजुरी

काठमाडौँ — तिलोत्तमा नगरपालिकामा प्रमुख बासुदेव घिमिरेले निर्वाचन आचारसंहिता उल्लंघन गरेको भन्दै निर्वाचन आयोगमा उजुरी परेको छ । तिलोत्तमा नगरपालिका–१० का प्रदीप थापाले नगर प्रमुख घिमिरेले पदको दुरुपयोग गर्दै एमालेका उम्मेदवारलाई भोट माग्दै भाषण गरेको, नारा जुलुसमा सहभागी भएको, नाचगान गरेको भन्दै निर्वाचन ऐन र आचारसंहिता अनुसार कारवाही गर्न माग गरेका हुन् ।

निर्वाचन आचारसंहिता २०७८ परिच्छेद ३ दफा ९ञ० मा पदबाट राजीनामा नदिई कुनै दलको वा उम्मेदवारको चुनावी कार्यक्रममा सहभागी हुन नपाइने उल्लेख छ । तर घिमिरेले भने सरकारका मन्त्रीहरुले पनि आचारसंहिता उल्लंघन गरेको भन्दै कारबाही गरेर देखाउन निर्वाचन आयोगलाई चुनौती दिएका थिए । तिलोत्तमाका निर्वाचन अधिकृत माधवप्रसाद लोहनीले घिमिरेविरुद्ध उजुरी परेकाले स्पष्टिकरण सोध्ने तथा निर्वाचन आयोगलाई पनि जानकारी गराउने बताए ।