वैशाख ३० को स्थानीय निर्वाचनको सरगर्मी बढेसँगै यतिखेर राजनीतिक दलहरु आफ्नो पक्षमा माहोल बनाउनका लागि तछाड–मछाड गरिरहेका छन् । नेताहरुको हेलिकप्टरमा देशदौडाहा पनि दिनप्रतिदिन बढ्दो नै छ ।
तर, दलहरु खुल्ला आमसभामा कार्यकर्ता भेला गरेर मात्र आफ्नो प्रभाव छरिरहेका छैनन्,पछिल्लो समय राष्ट्रियस्तरका चिरपरिचित कलाकारहरु प्रयोग गरेर नै आ–आफ्नो पार्टीमा लबिङ गर्न र भोट माग्न गीत बनाई रहेका छन् ।
अहिलेको प्रमुख सत्ताधारी दल नेपाली कांग्रेसले त आफ्नो पक्षमा उत्कृष्ट चुनावी गीत बनाउनेलाई २ लाख ७५ हजार रुपैयाँको पुरस्कार राशी नै राखेको छ ।
हामी राष्ट्रका गहना हौं भन्ने कलाकारहरु नै कुनै एक पार्टीका लागि भोट माग्न हिडिरहेका छन् । फलानो फलानो पार्टीमा भोट हाल्न भन्दै अपील गर्छन् । कलाकारलाई राष्ट्रको गहना भनेर इंगित गरे पनि कलाकार भने कुनै एक पार्टीका मात्र भएका छन् ।
गत चुनावमा पनि गायककार बद्री पंगेनीको स्वरमा सजिएको मै पनि एमाले सही पनि एमाले नामक गीत अत्याधिक लोकप्रिय बन्यो । गीत लोकप्रिय मात्रै बनेन एमालेलाई मत बटुल्न ब्रह्मास्त्र नै बनेको एमालेका नेताहरु नै बताउँछन् । हालको अवस्थामा पनि विभिन्न कलाकारका दर्जनौ गीतहरु आई नै रहेका छन् ।
आखिर किन कलाकारहरु यसरी पार्टीका गीत संगीत गाउँछन् र यसको प्रभाव कस्तो पर्छ भन्ने आम कौतुहलता पनि हुन सक्छ । यतिखेर पार्टीका लविङमा बनेका गीतहरु सामाजिक सञ्जालमा चर्चित भईरहेको छ । के साँचिकै यस्ता गीतहरुले जनमत बटुल्न सहयोग गर्छ ?
यस्ता गीतहरुले समाजमा सहजै प्रभाव पार्ने र संगीत प्रति मोह भएका व्यत्तिलाई आकर्षित गर्न सहज हुने भएकै कारणले राजनीतिक दलका शीर्ष नेतृत्वहरु पनि गीत बनाउनमा व्यस्त छन् । नेपाली कांग्रेसका केन्द्रीय स्तरका नेता गुरुराज घिमिरे र महामन्त्री विश्वप्रकाश शर्मा पनि अहिले गीत रेकर्ड गर्नमा व्यस्त देखिन्छन् । यसरी विश्वप्रकाशको आफ्नै शब्द र आफै खटिएर बनाएको गीतमा सुमित खड्का, राधिका हमाल कृष्णमान डंगोल र शशी थापाले स्वर भरेका छन् ।
पछिल्लो समय चुनावमा आफ्नो पक्षमा जनता तान्नका लागि समाजिक सञ्जाल टिकटक, फेसबुक र युट्युव लगायतमा यस्ता गीतहरु प्रशस्तै भेट्न सकिन्छ । स्थानीय स्तरमा यी यस्ता गीतहरु प्रयोग गरेर कार्यकर्ताहरु घरघरमा नै पुग्ने गरेका छन् । वास्तवमा यस्ता गीतहरुले मतदाताहरुमा कति प्रभाव पार्छ भन्ने यकिन तथ्य नभए पनि ,यसले दलहरुलाई भोट माग्ने राम्रो माध्यम बनेको छ ।
कलाकारहरु भोली चुनावी आमसभामा गएर यीनै गीत प्रस्तुत गरेर पनि प्रत्यक्ष रुपमा जनतासँग माहोल बनाउने काम गर्छन् । त्यसो त एमाले अध्यक्ष ओली करिष्मा मानन्धर, राजेन्द्र लिङ्देन रेखा थापालगायतका कलाकार बोकेर हिडिनै रहेका छन् । कालकारहरु पनि कतै न कतै यस्ता काम बाट नै भोली आफ्ना लागि पनि राजनीतिमा आउने बाटो खोजिरहेका छन् ।
प्रतिक्रिया