ओखलढुंगामा सवारी दुर्घटना ३ जना प्रहरीको मृत्यु, ६ जना घाइते

काठमाडौँ — ओखलढुंगाको मानेभञ्ज्याङ ६ मा सवारी दुर्घटना हुँदा ३ जना प्रहरीको मृत्यु भएको छ । जिल्ला प्रहरी कार्यालय ओखलढुंगाका प्रहरी निरीक्षक उद्धव पोखरेलले दिएको जानकारी अनुसार दुर्घटनास्थलमै २ जनाको मृत्यु भएको हो भने १ जनाको काठमाडौँमा उपचारकै क्रममा मृत्यु भएको हो । दुर्घटना आज बिहान भएको हो । सोलुखुम्बुबाट विराटनगर आउँदै गरेको बोलेरो दुर्घटना भएको हो ।

दुर्घटनामा परी मृत्यु हुनेमा प्रहरी हवल्दार भूपेन्द्र कार्की, प्रहरी जवान मनिष राजवंशी र प्रहरी जवान रूपक विष्ट रहेका छन् । कार्की र राजवंशीको घटनास्थलमै र विष्टको उपचारको क्रममा मृत्यु भएको प्रहरी निरीक्षक पोखरेलले जानकारी दिए । दुर्घटनामा परी अन्य ६ जना घाइते भएका छन् । बोलेरोको चालक पनि घाइते भएर काठमाडौँमा उपचारका लागि लगिएको छ । के कारणले दुर्घटना भयो र के कति क्षति भयो भन्ने कुराको विस्तृत विवरण आउन बाँकी छ ।