ग्रिनेडसहित दुईजना पक्राउ

काठमाडौँ — फुङ्लिङ नगरपालिका–३ मेदिवुङमा विष्पोटक पदार्थ (ह्याण्ड ग्रिनेड) सहित दुइजनालाई ताप्लेजुङ प्रहरीले पक्राउ गरेको । आईतबार दिउँसो बम देखाएर स्थानीयलाई धम्काउँदै हिँड्ने दुईजनालाई प्रहरीले पक्राउ गरेको हो । पक्राउ पर्नेमा फुङ्लिङ नगरपालिका–३ का चन्द्र मादेन र मिक्वाखोला गाउँपालिका–४ का सञ्जय लिम्बू रहेकाछन् । उनीहरुले सडक निर्माण गरिरहेका कामदार र ठेकेदारलाई बम पड्काएर हत्या गर्ने धम्की दिएको ठेकेदार प्रकाश लिम्बूले जानकारी दिए ।

पक्राउ परेका दुबैजना सोहि निर्माण कम्पनीमा कार्यरत थिए । बम देखाएर धम्की दिएको ठेकेदारले जानकारी गराएपछि नेपाली सेनाका सेनानी अदित श्रेष्ठ, ससस्त्र प्रहरीका प्रहरी उपरिक्षक रोशन बुढाथोकी र जिल्ला प्रहरी कार्यालय ताप्लेजुङका प्रहरी निरिक्षक राकेश यादवको टोली पुगेको थियो । बरामद गरिएको बम ह्याण्ड ग्रिनेड भएको र हाललाई खतरामुक्त रहेको प्रहरी निरिक्षक यादवले जानकारी दिएका छन् । सो बमलाई अदालतबाट स्विकृती लिएर डिस्पोज गरिने उनले जानकारी दिए ।