नेपालको सान्त्वना जित, ओमान ९ विकेटले पराजित

काठमाडौँ – आईसीसी पुरुष टी–ट्वान्टी विश्वकप छनोट अन्तर्गत ग्लोबल छनोट ए मा नेपालले तेस्रो स्थान हासिल गरेको छ । अल अमेरातमा आज तेस्रो स्थानको लागि भएको प्ले अफमा ओमानलाई ९ विकेटले हराउँदै नेपालले तेस्रो स्थान हासिल गरेको हो ।

ओमानले दिएको ८८ रनको लक्ष्य नेपालले १६ ओभर २ बलमा मात्र १ विकेट गुमाएर पूरा गर्यो । नेपालको जितमा कुशल भुर्तेलले अर्धशतकीय इनिङ्स खेले । कुशलले अविजित रहदै ५५ रन बनाए । कुशलले ५३ बलमा ३ चौका र २ छक्का प्रहार गरे ।

सेमिफाइनलमा पराजित भएपछि नेपाल र ओमानले तेस्रो स्थानको लागि प्रतिस्पर्धा गरेको हो । मंगलबार भएको सेमिफाइनलमा नेपाल युएईसँग पराजित भएको थियो । जसको कारण नेपालको अष्ट्रेलियामा हुने टी–ट्वान्टी विश्वकप खेल्ने सपना सकिएको थियो । ओमान सेमिफाइनलमा आयरल्याण्डसँग पराजित भएको थियो ।