ए डिभिजन लिगमा हिमालयन शेर्पाको लगातार तेस्रो जित, सातदोबाटो १–० ले पराजित

काठमाडौँ – सहिद स्मारक ‘ए’ डिभिजन लिगमा सातदोबाटो युथ क्लबलाई १–० गोल अन्तरले पराजित गर्दै हिमालयन शेर्पा क्लबले लगातार तेस्रो जित निकालेको छ ।

सोमबार भएको एक मात्रै खेलमा शेर्पाका लागि ४४ औं मिनेटमा कप्तान विश्वास श्रेष्ठले निर्णायक गोल गरे । प्रतियोगितामा शेर्पाको यो लगातार तेस्रो जित हो । जितसँगै शेर्पा सात खेलबाट ११ अंकसहित सातौं चरणको समाप्तिमा तालिकाको पाँचौं स्थानमा उक्लिएको छ । योसँगै सातौं चरणका खेल सकिएका छन् ।

साविक विजेता मछिन्द्र फुटबल क्लब सात खेलबाट १७ अंकसहित तालिकाको शीर्ष स्थानमा छ ।