‘ए’ डिभिजन लिगमा जावलाखेलको सहज जित

काठमाडौँ – सहिद स्मारक ‘ए’ डिभिजन लिग फुटबलमा जावलाखेल युथ क्लबले जित निकालेको छ ।

सोमबार भएको खेलमा जावलाखेलले नवप्रवेशी सातदोबाटो युथ क्लबलाई २–० गोल अन्तरले हराएको हो । जावलाखेललाई जित दिलाउन विपिन कँडेल र निकोलस फर्नान्डेसले एक एक गोल गरे । त्रिपुरेश्वरस्थित दशरथ रंगशालामा पहिलो हाफ गोलरहित बराबरीमा सकिएको खेलको दोस्रो हाफमा जावलाखेलले दुई गोल गरेको थियो ।

जितसँगै जावलाखेलले ६ खेलमा ७ अंक जोडेको छ । जावलाखेल नवौं स्थानमा उक्लिएको छ । सातदोबाटोले ६ खेलमा ८ अंक जोडेको छ । सातदोबाटो पाँचौं स्थानमा रहेको छ ।