बार्सिलोनाको च्याम्पियन लिग यात्रा कठिन बन्दै

काठमाडौँ – च्याम्पियन लिगमा बेनिफिकासँग बराबरी खेलेसँगै स्पेनिस क्लब बार्सिलोनाको नकआउट चरणमा प्रवेश गर्ने यात्रा झनै कठिन बनेको छ । मंगलबार राति घरेलु मैदान क्याम्प नाउमा भएको समूह चरणको खेलमा बेनिफिकासँगै गोलरहित बराबरी खेलेपछि बार्सिलोनाको अर्काे चरणको यात्रा मुश्किल देखिएको हो ।

बार्सिलोनाका पूर्व मुख्य खेलाडी जाभि हर्नान्डेजले सम्हालेपछि च्याम्पियन लिगको पहिलो खेल नै बराबरीमा रोकिएपछि आफ्नो अन्तिम खेलमा जित्नै पर्ने वा अन्य टिमको नतिजामा भर पर्नु पर्ने अवस्थामा पुगेको छ । बार्सिलोनाले अब समूह चरणको सबैभन्दा बलियो टिम बार्यन म्युनिखसँग सामना गर्ने छ । जुन खेल बार्सालाई जित्नै पर्ने दवाव हुने छ । बार्यन यस्तो टिम हो, जसले समूह चरणको कुनै पनि खेल नहारी शतप्रतिशत जित निकालेको छ ।

यदि बार्सा बार्यनसँग पराजित भएमा बेनिफिका र डाइनामो किभको खेलको नतिजामा भर पर्नु पर्ने हुन्छ । बेनिफिकाको हार वा बराबरी पनि बार्सालाई नकआउट चरणमा पुग्न पर्याप्त हुने समीकरण बनेको छ । अन्यथा नतिजा यसको विपरीत आएमा बार्सा च्याम्पियन लिगबाट नै बाहिरिने छ ।

यसै समूह चरणको हिजो नै भएको खेलमा बार्यनले डाइनामो किभलाई २–१ ले पराजित गरेको छ । खेल हुनुअघि बार्यनलाई यो खेल निकै सहज हुने अनुमान गरे पनि सोचे अनुसार हुन सकेन । बार्यनलाई जित निकाल्न निकै कठिन बनेको थियो । बायर्नलाई जिताउन रोबर्ट लेवाण्डोस्की र किङस्ले कोम्यानले समान १/१ गोल गरे । केइभको लागि डेनिस गार्मन्सले १ गोल गरे । जित निकालेको बार्यन १५ अंकसहित शीर्ष स्थानमा छ। बार्सिलोना सात अंकसहित दोस्रो स्थानमा छ। पाँच अंकसहित बेन्फिका तेस्रो स्थानमा छ । पुछारमा रहेको डिनामो किएभको मात्रै एक अंक भएको छ।