रौतहटमा कार दुर्घटना हुँदा चार जनाको मृत्यु

काठमाडौँ – रौतहटमा शनिबार राति भारतीय नम्बर प्लेटको कार दुर्घटना हुँदा कारमा सवार चार जनाको मृत्यु भएको छ । चन्द्रनिगाहपुरबाट गौर तर्फ तीव्र गतिमा जाँदै गरेको कार यमुनामाई गाउँपालिकाको झुन्खुन्वा चौक नजिक अनियन्त्रित भई राति १० १५ मा दुर्घटना भएको हो ।

चन्द्रनिगाहपुरबाट गौर तर्फ जाँदै गरेको यूके १२सी २९०० नम्बरको कार प्रहरीका अनुसार झुन्खुवाचौकदेखि उत्तरपट्टी रहेको पेट्रोलपम्प नजिक दुर्घटनामा परेको कार सडकभन्दा करिब २० मिटर तल पानीमा डुबेको थियो । घटनास्थल नजिकै नियमित ड्युटीमा खटिएका प्रहरीले सो घटना देखेपछि उद्धारका लागि जिल्ला प्रहरी कार्यालयबाट थप मद्दत मागेको थियो ।
मृतक चारै जनाको शव पोस्टमार्टमको लागि जिल्ला अस्पताल गौरमा राखिएको छ भने उनीहरुको परिचय खुल्न बाँकी नै छ ।