काठमाडौँ – नेपाल कम्युनिस्ट पार्टी ९एमाले० को केन्द्रीय कमिटी बैठक आज (शुक्रबार) बस्दै छ । बैठक बालुवाटारमा बिहान ११ बजे बस्दै छ । बुधबार सम्पन्न एमालेको १०औं महाधिवेशन आयोजक कमिटीको बैठकले शुक्रबारका लागि केन्द्रीय कमिटीको बैठक बोलाउने निर्णय गरेको थियो ।
प्रधानमन्त्रीसमेत रहेका एमाले अध्यक्ष केपी शर्मा ओलीले महाधिवेशन आयोजक कमिटी विघटन गरी केन्द्रीय कमिटीको बैठक बोलाएका हुन् । अध्यक्ष ओलीले महाधिवेशन आयोजक कमिटीलाई नै केन्द्रीय कमिटीमा रूपान्तरण गरेका थिए ।
माधव नेपाल पक्षले भने आजका लागि बोलाइएको केन्द्रीय कमिटीको बैठक बहिष्कार गर्ने भएको छ । नेपाल समूहको बिहीबार बसेको स्थायी कमिटी बैठकले केन्द्रीय कमिटी बैठक बहिष्कार गर्ने निष्कर्ष निकालेको हो ।
बिहीबार बानेश्वरमा बसेको नेपालपक्षका स्थायी कमिटी सदस्यहरुको बैठकले अहिलेकै अवस्थामा शुक्रबारको बैठकमा सहभागी हुन नसकिने निर्णय गरेको नेपालपक्षका नेता योगेश भट्टराईले बताउनुभयो ।
ओलीपक्षले यो केन्द्रीय कमिटी २०७५ जेठ २ को अवस्थाकै भएको दाबी गरेको छ। तर, त्यसमा माओवादीबाट आएका नेताहरुलाई समेत समावेश गरिएकाले नेपालपक्षले जेठ २ मा फर्केको भन्न नमिल्ने जनाएको छ ।
बैठकपछि सञ्चारकर्मीसँग बोल्दै नेपाल पक्षका नेता भीम रावलले सहमति नहुँदासम्म कुनै पनि बैठकमा सहभागी नहुने बताउनुभयो । नेता रावलले दशौं महाधिवेशन आयोजक कमिटीलाई भंग नगरी केन्द्रीय कमिटीमा रुपान्तरण गर्ने भनिएकोमा पनि आपत्ति जनाए ।
यस्तै, पार्टीलाई एकताबद्ध रुपमा अगाडि बढाउन उचित र औपचारिक सार्थक वार्ता तथा सहमतिको प्रक्रिया अवलम्बन गरिनुपर्ने निर्णय भएको पनि रावलले जानकारी दिनुभयो । ‘केन्द्रीय कमिटीको बैठक आवश्यक तहको सहमित तथा स्थायी कमिटीको बैठकबाट निर्णय प्रस्तावको आधारमा मात्र बोलाइनु पर्दछ,’ ।
प्रतिक्रिया