कालीकोटमा जिप दुर्घटना हुँदा एक जनाको मृत्यु

काठमाडौँ – कालीकोटमा जिप दुर्घटना हुँदा एक जनाको मृत्यु भएको छ । चार जना घाइते भएका छन् ।

कालीकोटको नरहरिनाथ गाउँपालिकामा रास्कोट नगरपालिकाबाट मान्मा जाँदै गरेको प १ल २३ नम्बरको जिप नरहरिनाथ गाउँपालिकाको लालिघाटमा दुर्घटना हुँदा एकजनाको घटनास्थलमै मृत्यु भएको कर्णाली प्रदेश प्रहरीले जानकारी दिएको छ ।

प्रहरीका अनुसार गाडी भिरालो र चिप्लो बाटोका कारण सडक छेउमा पल्टिएको थियो । जिपमा १४ जना यात्रु सवार थिए । दुर्घटनामा परी सान्नी त्रिवेणी गाउँपालिका– ३ की ३५ वर्षीया पम्फा फडेराको मृत्यु भएको हो । आज बिहान भएको दुर्घटनामा अन्य ४ जना घाइते भएको र उनीहरुको अवस्था सामान्य रहेको प्रहरीले जनाएको छ ।

घटनास्थलबाट घाइतेहरुको उद्धार गरी सामान्य उपचारपछि घर पठाइएको प्रहरीले जनाएको छ ।