कोरोनाले नेपालमा एकैदिन २१४ जनाको मृत्यु, ८ हजार ९६० जनामा संक्रमण पुष्टि

काठमाडौँ – कोरोना भाइरस संक्रमणका कारण थप २१४ जनाको मृत्यु भएको छ । यससँगै नेपालमा कोरोना संक्रमणबाट मृत्यु हुनेको संख्या ४ हजार ४६६ पुगेको स्वास्थ्य तथा जनसंख्या मन्त्रालयले जानकारी दिएको छ । पछिल्लो २४ घण्टामा नेपालमा ८ हजार ९६० जना कोरोना संक्रमित पुष्टि भएको छ ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा १९ हजार ४७४ र एन्टिजेन विधिबाट ७७१ नमुना परीक्षण गरिएकोमा ८ हजार ९६० जनामा संक्रमण पुष्टि भएको हो । यससँगै सक्रिय संक्रमितको संख्या १ लाख ५ हजार २०७ पुगेको छ ।

आज देशभर ५ हजार ५५ जना संक्रमित निको भई डिस्चार्ज भएका छन् । देशभर ४९७ जना व्यक्ति क्वारेन्टाइनमा रहेको स्वास्थ्य मन्त्रालयले जनाएको छ ।