कोरोनाको दोस्रो लहरले जनता हायलकायल हुँदा पनि खोप ल्याउने जिम्मा पाएका एजेण्टहरु कमिशनकै व्यस्थ

काठमाडौँ – कोरोना विरुद्धको खोप अभावमा आम सर्वसाधारण मृत्युवरण गर्न बाध्य बनिरहँदा सरकार भने विचौलियालाई दोष दिएर पन्छिरहेको छ । विचौलियाहरुले कमिशनमा कुरा नमिलेर खोप आयातमा ढिलासुस्ती गर्दा पनि सरकार भने कारवाही गर्नुको साटो भूतप्रेतको संज्ञा दिएर उन्मुक्ति दिन क्रियाशिल देखिन्छ ।

कोरोना महामारीको दोश्रो लहरसंगै विश्वका धेरै देशहरुले यतिवेला कोरोना विरुद्धको खोप अभियानमा जोडतोडका साथ लागेको छन् । तर दुई ठूला खोप उत्पादक देशको विचमा रहेको नेपालमा भने कोरोना खोप कमाउको धन्दा बन्दा खोप अभियान नै प्रभावित बनेको छ । तीन महिनाभित्र सबै नागरिकलाई निशुल्क खोप लगाउने उद्घोष गरेको सरकार विचौलियाकै कारण असफल भएको छ । यता स्वास्थ्यमन्त्री हृदयश त्रिपाठीले पनि सार्वजनिक रुपमै भूतप्रेत रुपी विचौलियाका कारण नेपालमा समयमै खोप आयात हुन नसकेको आरोप लगाउने गरेका छन् । उनले भूतप्रेत भनेका मानिसहरु हुन सुुरज बैद्य विजय दुगड र अभिषेक दुगड लगायतका ब्यक्ति । ६० लाख मात्रा खरिद गर्न खोज्दा कोभिसिल्ड नामक खोप उत्पादक सिरम इन्स्टिच्युटको नेपाल एजेन्ट हुकाम डिष्ट्रिब्युटर्स एन्ड लजिस्टिक प्राली सक्रिय बन्दा खोप खरिद प्रक्रिया नै प्रभावित बनेको हो । जुन कम्पनी स्वास्थ्यमन्त्रीले भूतप्रेत भनेका तिनै व्यक्तिहरुको हो । तर प्रश्न यहि छ देश र जनताको अहित हुने गरी सल्बलाउने बिचौलियाहरु अघि सरकार किन निरिह छ ?

आरोप लागेको हुकुम डिस्ट्रिब्युसन एन्ड लजिस्टिक्स प्रालिले भने खोप खरीदको प्रक्रिया रोक्न आफ्नो कुनै भूमिका नरहेको दाबी गरेको छ । हुकमले बिहीबार विज्ञप्ति निकालेर भारतमा नै महामारीको दोस्रो लहर शुरू भएको तथा खोप उत्पादक सेरम इन्स्टिच्यूटमा आगलागी भएका कारण खोप आउन रोकिएको जनाएको छ । यता स्वास्थ्य मन्त्रालयले पनि आजै एक विज्ञप्ती जारी गर्दै हुकुमकै शव्द सापटि लिंदै तत्काल ५० लाख कोभिशिल्ड खोप खरिद गर्ने अवस्था नरहेको जनाएको छ । तर सुरज बैद्य–विजय दुगडको यो कम्पनीले निकालेको विज्ञप्तिमा उल्लेख भएका जिकिरहरुबाटै कमिसनका कारण खोप आयात प्रभावित भएको पुष्टि हुन्छ । भारतमा कोरोना बढे पनि नेपाली बिचौलियाले चलखेल नगरेको भए सम्झौता हुन सक्थ्यो । त्यो खोप चाँडो नेपाल आउँथ्यो पनि । तर सरकार यस्ता कुकृत्यप्रति किन मौन छ ? के सरकार नै उनीहरुको संरक्षणमा लागेको हो ?

अहिले विश्वका अधिकांश मुलुकहरुले आफ्ना सबैजसो नागरिकलाई खोप दिएर सुरक्षित बनाईसकेका छन् । भारत र चीनमा उत्पादन भएका खोप लगाएर टाढा टाढाका मुलुकहरु सुरक्षित भइसकेका छन् । तर हामी महामारीको मध्यभागमा खोप अभियान नै स्थगित गरेर हातमाथि हात राखेर बस्न विवस छौं । किनभने यहाँ त सरकार नै विचौलियाको संरक्षणमा लागेको छ । अनि विचौलिया कमिशनको पछि लागेका छन् ।