Breaking

राष्ट्रपति भण्डारीबाट हिउँदे अधिवेशन अन्त्यको घोषण


काठमाडौँ – संसद् हिउँदे अधिवेशन अन्त्य भएको छ । मन्त्रिपरिषद्को सिफारिसमा राष्ट्रपति विद्यादेवी भण्डारीले सोमबार अपराह्न १ बजेदेखि प्रतिनिधिसभाको चालु अधिवेशन अन्त्य भएको घोषणा गर्नुभएको हो ।

यसअघि प्रधानमन्त्रीको सरकारी निवास बालुवाटारमा आज बिहान बसेको मन्त्रिपरिषदको बैठकले अधिवेशन अन्त्य गर्न राष्ट्रपतिसमक्ष सिफारिस गरेको थियो । मन्त्रिपरिषदको सिफारिसमा राष्ट्रपतिले अधिवेशन अन्त्य र आह्वान गर्ने संवैधानिक व्यवस्था रहेको छ । जेठ १५ गते बजेट ल्याउने र त्यसअघि नै सरकारका नीति तथा कार्यक्रम सार्वजनिक गर्नुपर्ने भएकाले अधिवेशन अन्त्यको निर्णय गरिएको सरकारका प्रवक्ता पार्वत गुरुङले जानकारी दिनुभयो । संसद पुनःस्थापना भएपछि गत फागुन २३ गतेदेखि हिउँदे अधिवेशन सुरु भएको थियो । प्रधानमन्त्री केपी शर्मा ओलीले गत पुस ५ गते विघटन गरेको संसदलाई पुनःस्थापना गर्न सर्वोच्च अदालतले फागुन ११ गते आदेश दिएको थियो ।